“Үҙем өсөн йәшәргә хаҡым юҡмы ни?!

“Пенсияға сығыу йәшен күтәргәндәренә тиклем үк уны рәсмиләштереп өлгөргәйнем. Шуға хәҙер пенсия аҡсаһын да, эш хаҡын да алам. Ишкә – ҡуш, тигәндәй, күҙем асылып ҡалғандай булды. Ҡыҙым менән улым – үҙаллы тормошта, – ти ул. – Хеҙмәт коллективым һәйбәт, хатта икенсе йортом кеүек. Унда эшкә әүрәп, төрлө һыҙланыуҙарҙы онотҡандай булам. Тик бына хәҙер ҡыҙым менән улым ейәндәрен тәрбиәләшеүҙе һорай”.

“Өләсәй ярҙамлаша инде ул”, – тип уйлар бәғзеләр. Тик бына ҡыҙы ейәндәрен көн һайын ҡарауҙы һорай икән. Улар: “Әсәй, һин уҡытыусы бит. Шуға балаларыбыҙҙы бик яҡшы тәрбиәләр инең”, – тип әлегә уйларға ваҡыт биргән.

Ә Зәлифә ҡыҙы менән улын яңғыҙы тәрбиәләгән, уларҙы аяҡҡа баҫтырыу өсөн бер нисә эштә көс түккән. Әле уның үҙе өсөн йәшәп алыр сағы. “Ейәндәремде яратам, һүҙ ҙә юҡ. Тик минең дә әҙерәк кешесә йәшәгем, донъя күргем килә. Хәҙер алдымда ике һайлау: үҙем өсөн йәшәргәме, әллә яҡындарымдың именлеген хәстәрләү өсөн тағы шәхси тормошом хаҡында оноторғамы?”

Баҡтиһәң, тиҙҙән ҡыҙы менән килене бер юлы тигәндәй декрет ялынан һуң эшкә сыҡмаҡсы икән. “Кескәйҙәр балалар баҡсаһына йөрөһә, күпкә яҡшыраҡ”, – тип тә әйтеп ҡараған ҡатын. Тик ҡыҙы менән улы был ярҙамы өсөн әсәләренә хатта аҡса түләргә лә риза. “Ейәндәрең мәктәпкә уҡырға барғас, тағы яратҡан эшеңә төшөрһөң”, – ти икән балалары...