Ауыр хәлдә ҡалған балалар өсөн ҙур ярҙам

Быйыл июлдән алып Мәскәү, Тула, Курск, Тверь, Ярослав, Рязань, Владимир өлкәләре, Ставрополь крайы һәм Башҡортостандың интернат һәм медицина учреждениеларына гигиена әйберҙәре, балалар йыһаздары, кейем-һалым, канцелярия тауарҙары һәм уйынсыҡтар менән машиналар барҙы. Акцияны “Фармэко”, “Детский мир” һәм “МС Интермак Авто” компаниялары “Столица милосердия” хәйриә фонды менән берлектә тормошҡа ашыра. Уларҙың тырышлығы арҡаһында интернат йорттарында тәрбиәләнгән балалар өсөн дөйөм хаҡы 27 миллион һум тәшкил иткән гуманитар йөк йыйылған һәм төбәктәргә алып барып еткерелгән.

– Хөрмәтле дуҫтар, мин Башҡортостанда беренсе тапҡыр һәм ике көн эсендә әйтеп бөтөрөп булмаҫлыҡ тәьҫораттар алдым. Был мәрхәмәтлек акцияһында ҡатнашып, мохтаж балаларға ярҙам итеү ҙур ҡыуаныс килтерҙе. Бөгөн акцияның беренсе этабын тамамлайбыҙ – ул беҙ булған илдең ун төбәге. Әле бында булыуыма бик шатмын һәм тағы килермен тип ышанам, – тине “ФармЭко” компанияһы директорҙар советы рәйесенең беренсе урынбаҫары Геннадий Дюмин.

Был ярҙамды Өфөнөң 17-се балалар дауаханаһы, Шишмә үҙәк район дауаханаһы, “Ғаилә” республика ресурс үҙәгенең махсуслашҡан Бала йорто, балалар йорттары һәм приюттар, “Доброе сердце” әсәләр советы тәрбиәләнеүселәре аласаҡ.

– Ошондай ҡояшлы көндә Башҡортостанда булыуыма һәм хеҙмәтебеҙ емештәрен күреүемә бик шатмын. Мәрхәмәтлек ярҙамының кемгә тәғәйенләнгәнен үҙ күҙҙәребеҙ менән күрҙек. Каринэ Владимировнаға йылы ҡабул иткәне өсөн айырым рәхмәт. Башҡарған эштәрегеҙ, ауыр хәлдәге балаларҙы яңғыҙҙарын ҡалдырмағанығыҙ өсөн рәхмәт. Беҙҙе саҡырғанығыҙ өсөн дә рәхмәтлебеҙ, беҙ ихлас күңелдән бындай сараларҙа ҡатнашабыҙ, – тин “Столица милосердия” хәйриә фондының попечителлек советы рәйесе Владислав Федотов.

“Детский мир” компанияһының пиар-менеджеры Алена Никандорова ла тәьҫораттары менән уртаҡлашты.

– “Детский мир” компанияһы “Столица милосердия” фонды менән ете йылдан ашыу хеҙмәттәшлек итә. Йыл һайын беҙ социаль учреждениеларҙағы һәм ярҙамға мохтаж балаларға кәрәкле әйберҙәр тапшырабыҙ. Беҙҙең патронаж аҫтында Рәсәй, Ҡаҙағстан һәм Беларусь республикаһында урынлашҡан 1146 социаль учреждениеларындағы 550 мең самаһы бала бар. Былтыр беҙ дөйөм алғанда 843 миллион һумлыҡ тауар тапшырҙыҡ, – тине ул.