+21 °С
Болотло
Новости
1 Июнь 2020, 12:41
Ғәрәсәттең зыяны миллионлап иҫәпләнә
Яйлап ҡына республика ғәҙәти тормошҡа әйләнеп ҡайта башланы. Хәҙер Хөкүмәттә үткән оператив кәңәшмәләрҙә элекке кеүек коронавирус ҡына түгел, башҡа мөһим мәсьәләләр ҙә ныҡлап ҡарала. Быға тиклем туҡтатылып торған ғәҙәттән тыш хәлдәргә анализ да яһала башланы.
Республиканың Ғәҙәттән тыш хәлдәр буйынса дәүләт комитеты рәйесе Фәрит Ғүмәров аҙна эсендә булған ошондай хәлдәргә байҡау яһаны. Яҙҙың һуңғы көнө дауыл, боҙборсаҡ һәм ныҡлы ел менән килде. Был кешеләргә һәм ауыл хужалығына зыян килтермәй ҡалманы.
– Көслө ел арҡаһында тораҡ йорттар, мәктәп, балалар лагерҙары ҡыйыҡтары зыян күргән. Бүздәк, Шаран, Кушнаренко, Саҡмағош райондарында ауыл хужалығы предприятиелары биналары емерелгән. Электр менән тәьмин итеү боҙолған. Дөйөм алғанда, 3 850 квадрат метр майҙанда зыян күрелгән, – тине ул.
Көслө ел һәм боҙборсаҡ яуыуы арҡаһында ауыл хужалығы үҫентәләре лә зыян күргән. Мәҫәлән, Бүздәк районы буйынса ғына зыян 20 миллион һум тәшкил иткән. Шәхси хужалыҡтарҙа ла ғәрәсәт эҙһеҙ үтмәне: теплицалар, сәселгән баҡсалары зыян күргән.
Янғындарға килгәндә, бер аҙна эсендә 327 янғын теркәлгән, уларҙа ике кеше һәләк булған. Кешеләрҙең янғында үлеүе йәһәтенән хәлдәр яҡшырған. Ике урман янғыны теркәлгән, улар ваҡытында һүндерелгән. Ете кеше бейеклектән ҡолаған, берәүһе һәләк булған, ҡалғандары дауаханала.
Был аҙна эҫе тороу сәбәпле һыу ятҡылыҡтарында фажиғәләр теркәлә башланы. Уҙған аҙна эсендә дүрт кеше батып үлгән, уларҙың береһе бала.
Радий Фәрит улы ошо көндәрҙә пляждар буйынса ҡарар ҡабул ителәсәк тине.
Фото: news.myseldon.com
Автор: Альфия Мингалиева.
