Дөрөҫ йоҡларға өйрән

Ауырыу төн уртаһында кинәт көсәйеп китә, елһенә. Быуылыу осраҡтары ла була. Тынысланып йоҡлау өсөн ятҡан ерегеҙҙе ҡулайлаштырырға кәңәш ителә.

Иҫке матрасты үҙгәртеп алығыҙ.
Яңы матрас һатып алырға мөмкинлегегеҙ юҡ икән, иҫке матрасығыҙҙың өҫтөнә 5 сантиметр ҡалынлығындағы пенополиуретан һалығыҙ.

Йоҡо бүлмәһен ҡараңғы­латығыҙ.
Яҡтылыҡ организмдың мелатонин – йоҡларға ярҙам иткән гормон эшләп сығарыу һәләтен кәметә. Әлбиттә, яҡтылыҡты үткәрмәгән пәрҙәләр алып элергә лә була, әммә арзаныраҡ саралар ҙа бар: бер нисә рулон ҡара­ғусҡыл төҫтәге пленка алып, тәҙрәгә йәбештерергә мөмкин.

Карауаттағы йәймәне алмаштырығыҙ.
Мамыҡ йәймә, әлбиттә, зауыҡ­лылыр, тик ревматоидлы артриттан яфаланғандар өсөн саманан тыш ҡаты, тығыҙ, уңайһыҙ булыр. Иң яҡшыһы – трикотаж йәймә һайлағыҙ.

Табанығыҙ өсөн махсус ҡулайлама яһағыҙ.
Ревматоидлы артрит арҡа­һында аяҡ табаны үтә һиҙгергә әйләнә. Юрған ябынмаһаң – аяҡ өшөй, ябынһаң – табандар һыҙ­лай. Был осраҡта карауатта матрас менән пружина блогы араһына юрғанды күтәреп торорлоҡ таҡта ҡуйырға мөмкин.

Муйын ауыртыуын баҫығыҙ.
Төн уртаһында муйынығыҙ ауыртып уянаһығыҙмы? Йоҡо тыныс булһын тиһәгеҙ, башы­ғыҙҙы һыу тултырылған мендәргә һалырға кәңәш ителә. Джонс Хопкинс университеты ғалим­дары асыҡлауынса, муйыны ауыртҡан кешеләр ябай мендәргә ҡарағанда, һыу тултырылған яҫтыҡта тиҙерәк йоҡлап китә һәм төндә һирәк уяна икән.