“Беҙгә түҙергә тура киләсәк”

Төбәк етәксеһе әлеге ва­ҡытта барлыҡ донъяла, беҙ­ҙең илде уратып алған дәүләт­тәрҙә ҡур­ҡыныс инфекция­ның ҡото­роуын, кешеләрҙең бик ауыр хәлдә ҡалыуын билдәләп үтте һәм хәлдең етди булыуын тағы берҙе һыҙыҡ өҫтөнә алды.
Барлыҡ муниципалитет баш­лыҡтарына инфекцияны иҫкәр­теү буйынса штабтарға етәксе­лек итергә, штаб һәм ҡаты экономия режимына күсергә ҡушылды.

– Әлеге ваҡытта беҙ коронавирус буйынса киҫкен этап­тарҙың береһенә инәбеҙ, дөйөм иҡтисади йәһәттән дә. Республика ҡаҙнаһына үҙгә­рештәр индереү хаҡында ет­ди уйлай башланыҡ, был ағымдағы һәм киләһе йыл­дарға ла ҡағыла. Мин республика халҡына мөрә­жәғәт итәм: беҙгә түҙергә тура киләсәк. Бихисап социаль проекттар, ҡыҙғанысҡа ҡар­шы, туҡтатылып торасаҡ, тәүге сиратта төҙөлөш ха­ҡында һүҙ бара. Башлан­ғандарын тамам­лаясаҡбыҙ, ә ҡалғандарын кисектереп торорға тура киләсәк, шул иҫәптән мәҙәниәт йорттары, физкультура-һауыҡтырыу комплекстары, бассейндар хәл яҡшырған заманға тиклем тороп торасаҡ. Быларҙың барыһы ла ҡатмарлы осорға резерв туплау, иҡтисадҡа ярҙам итеү өсөн эшләнә, сөн­ки иҡтисад ҡаҡ­шаһа, ғөмү­мән, күп ғәмәл­дәрҙе оноторға тура киләсәк. Муни­ципа­ли­теттар ҙа ҡаҙна­ларын ҡабат­тан ҡарарға тейеш. Мәҫәлән, урындағы ансамблгә костюм һатып алырға йә иһә ЗАГС фасадын ремонт­ларға йы­йын­ғанһығыҙ икән, тороп тороғоҙ. Барыһы ла әлеге ваҡыттағы ихтыяждан сығып эшләнергә тейеш. Ха­лыҡты һәм иҡтисадты хәс­тәр­ләү өсөн резервтар булды­рығыҙ, – тине Радий Фәрит улы.

Республика Башлығы Хө­кү­мәткә тиҙ арала республика иҡтисадына ярҙам күрһәтеү сараларын туплаған програм­маның вариантын әҙерләргә ҡушты.

– Беҙҙең республика һәм, ғө­мүмән, дәүләтебеҙ һуғыш­тан һуң бындай тиңе булма­ған са­ҡырыу алғаны юҡтыр. Беҙгә бөтәһе бер юлы килде: иҡтисади көрсөк, коронавирус инфекция­һының етди хәүефе. Был хәлде идара итеү аппараты һөҙөмтәле эшлә­гәндә генә юғалтыуһыҙ үтә аласаҡбыҙ. Беҙҙең ҙур команданы штаб эше режимына күсергә саҡырам. Һеҙ аңлар­ға тейеш: беҙ хәрби хеҙмәткә саҡырылған кеүек­беҙ. Әгәр ҙә тотороҡло эш атмос­фе­раһын булдырһаҡ, был хәлде лә үтәсәкбеҙ. Иҡти­сади по­тен­циалыбыҙ ошо мөмкин­лекте бирә тип инанам. Беҙ­ҙең идара итеү мөм­кин­лек­тәре һәм һәләтебеҙ бар, һәм халыҡ беҙгә ҡу­шылыр тип уйлайым, – тине Радий Фәрит улы.

Республика Башлығы үт­кәр­гән оператив кәңәшмәлә “Роспотребнадзор” идара­лығы вәкиле Александр Жеребцов әлеге ваҡытта 14 көнлөк үҙаллы изоляция режимын боҙған 37 ке­шегә ҡар­шы административ хоҡуҡ боҙоу протоколы төҙөл­гәнен белдерҙе.

Әлеге ваҡытта “Роспотребнадзор”, халыҡты социаль хеҙмәт­ләндереү ойошмалары хеҙмәт­кәрҙәре көн һайын сит илдән ҡайтҡан һәм карантин режимын һаҡларға тейеш булған граждандар йәшәгән урындарҙы тикшерә. Барлыҡ мәғлүмәттәр теркәлә һәм режимды боҙоусы­лар закон алдында яуап бирәсәк.

Баш ҡалала 65 йәштән өл­кәндәр өсөн дә карантин режимын индерәсәктәр. Уның механизмы бөгөн үк хәл ителәсәк.
– Был һәр йәһәттән уйла­нылған документ булырға тейеш. Тәүге сиратта беҙ оло йәш­тәгеләргә мәғлүмәтте нисек еткереү, нисек дәртлән­дереү, нисек уларға ярҙам итеү, аңлатыу тураһында уйларға тейешбеҙ. Карантин фәҡәт уларҙың хәүефһеҙлеге өсөн индерелә, – тине Радий Хәбиров.

Оператив кәңәшмәлә шулай уҡ “Башфармация” сел­тәренә 418 мең битлек һа­тыуға сығарыласағы мәғлүм булды. Был хаҡта һаулыҡ һаҡлау министры Максим Забелин хәбәр итте.

Унан тыш, 30 мартта Төр­киәнән 700 мең битлек ҡайта­рыласаҡ. Башҡортостан Баш­лығы Радий Хәбиров һаҡланыу сараларын тигеҙ һәм дөрөҫ итеп таратырға, бер ҡулға иҫәпле күләмдә биреүҙе ойошторорға ҡушты. Шулай уҡ республикала күп тапҡыр ҡуллана тор­ған битлектәрҙе тегеү тәүлегенә 50 мең данаға етергә тейеш.