+21 °С
Болотло
Новости
24 Март 2020, 11:30
Бейәне ҡотҡарғандар
Сибай ҡалаһының Төньяҡ ҡасабаһында йәшәүселәр батҡаҡҡа сумған бейәне күреп ҡала һәм ярҙамға ашыға. Әммә малҡайҙы ҡотҡарыу еңелдән булмай. Сөнки ҡасабала үткән йыл юл ҡаҙылған һәм балсыҡ менән күмелгән. Ҡышын йәнә был урынды ҡаҙып, торба һалырға уйлағандар. Ҡапыл ирегән ҡарҙан соҡорға һыу йыйылған, һөҙөмтәлә ул һаҙлыҡҡа әйләнгән, тәрәнлеге хатта урыны менән ике метрға тиклем барып еткән. Тап ошо соҡорға төшкән инде меҫкен малҡай.
Ҡасабала йәшәүселәр уны осраҡлы ғына күреп ҡалып, хужаһын эҙләй башлай. Күмәкләшеп атты сығарырға маташыу һөҙөмтә бирмәгәс, ҡеүәтле техника эҙләү башлана. Кемдер дуҫының внедорожнигы булыуын иҫенә төшөрә һәм тиҙ арала уға шылтырата. Бәхеткә күрә, ҡеүәтле автомобиль ҡаршылыҡтар аша булһа ла фажиғә урынына килеп етә һәм хәле бөтөп барған бейәне тартып сығара.
Бахыр малҡайҙың ҡурҡыуынан һәм хәле бөтөүҙән аяҡтары ҡалтырана, ул хатта баҫып та тора алмай. Уны арбаға һалып, хужаһы һарайына алып ҡайтҡан. Аҙаҡ ул белдеренсә, бейәнең хәле яҡшырған, тимәк, ул имен-һау ҡолонлаясаҡ. Бейә ҡотҡарылған да ул, ә бына ҡасабала йәшәүселәрҙе килеп тыуған хәлдән резина итектәр генә ҡотҡарырмы?
Фото: Сибай News сайтынан.
Карима Усманова
