+21 °С
Болотло
Новости
11 Февраль 2020, 09:15
Битлектәрҙең стратегик запасы ҡайҙа ята икән?
Хәтерегеҙҙәме икән, 2012 йылдың декабрендә сираттағы тапҡыр донъя бөтөүе тураһында хәбәр иттеләр ҙә, бер ҡатлы халыҡ магазиндарҙан тоҙ, шәм, шырпы кеүек ваҡ-төйәкте, ҡайһы бер аҙыҡ-түлекте һыпырып алып ҡуйҙы. Йәнәһе, заман ахыры етһә, баҙҙа ғына ашарға бешереп, май шәм яҡтыртып, тишектән ғәрәсәтте ҡарап ятасаҡ. Һәм бына һиңә мә – донъя үҙ урынында. Тик бер-бер артлы бәләләре сығып ҡына тора. Сусҡа киҙеүе, ҡош киҙеүе, иҡтисади көрсөк, ҡоролоҡ, самаһыҙ эҫе йәй, атипик пневмания, янғын, йүнһеҙ АҠШ, Сүриә... Һәм бына һиңә мә – коронавирус.
Тап ана шул вирустан һаҡланыуҙың бер сараһы – медицина битлеге кейеп йөрөү. Рәсәй Хөкүмәте Роспотребнадзорға битлектәрҙең стратегик запасын әҙерләргә бойорған. Росрезерв, РФ Сауҙа-сәнәғәт министрлығы (Минпромторг) нисә битлек кәрәгәсәген күҙалларға тейеш.
Министр Денис Мантуров белдереүенсә, беҙ тәүлегенә бер миллион дана маска етештерә алабыҙ, йылына – 900 миллион. Әле Рәсәйҙә уны 20 предприятие сығара. Вирус хәүефе үтеп, битлектәр күп артып ҡалһа, уны Росрезерв һаҡлауға һатып аласаҡ.
Хәҙер китер инде битлектәргә хаҡ артып. Юҡ! Артырға тейеш түгел! Кем арттыра, кәрәген бирәбеҙ, тигән кеүек һүҙҙәр ҙә ишетелде ҙур етәкселәр яғынан.
Гуманитар ярҙам маҡсатында Ҡытайға ике миллион битлек ебәрергә лә ниәтләп торабыҙ. Тик ул ғына коронавирустан һаҡланырға ярҙам итмәй шул. Йәғни 100 процент гарантия юҡ. Шулай ҙа, ана бит, бөтә Ҡытай - битлектә...
Фото: Фейсбук.
Яңылыҡ авторы: Алһыу Ишемғолова
https://yeshlek.rbsmi.ru/articles/ya-yly-tar-ta-ma-y-netu/Bitlekt-r-e-strategik-zapasi-ay-a-yata-ik-n-115985/
