«Яуҙа яралған мөхәббәт»

"Теге өсәү" тапшырыуы эш көндәрендә иртәнге сәғәт етенән унға тиклем тура эфирға сыға, заман менән бергә атлай, уны алып барыусы өс егет тыңлаусыларҙы ҡыҙыҡ­һын­дырған көнүҙәк мәсьәләләрҙән ситтә ҡалмай, уртаға һалып һөйләшә, фекерҙәр йыя, уйната, уйлата. Быйыл республикала һәм илдә ҙур ваҡиғалар көтөлә. Шуларҙың иң мәртәбәлеһе – Еңеүҙең 75 йыллығы. Яңы йылдан һуң Филүс, Йәмил һәм Ғәзиз тыңлаусылар менән бергә тулыландыра торған яңы, йөкмәткеле сәхифә асты. "Яуҙа яралған мөхәббәт" рубрикаһы – ул дәһшәтле һуғыш һәм сикһеҙ көслө һөйөү тураһындағы халыҡсан тарихтарҙы респуб­ликаға яңғыратыуға нигеҙләнгән проект. Тың­лаусылар "Юлдаш" радиоһының "Бәйләнештә" социаль селтәрендәге рәсми төркөмөнә инеп, унда ғаиләләрендә, күрше-күләндә, нәҫел-нәсәбәлә, ауылдарында, райондарында булған тарихтарҙы ҡалдыра ала. Ул тарихтар – һуғыш яландарында, фронтта, тылда, госпиталдәрҙә яралып, йәндәрҙе йомшартҡан, еңеүҙәргә килтергән мөхәббәт тураһында. Кесе йома һайын "Теге өсәү" тапшырыуының тура эфирында ошо шәлкемдән бер тарих мөхәр­рирләнеп уҡыла.

Һуғышҡа йөрәктәр аша ҡараш ташлатыр тарихтарҙы бергә барлайыҡ, дуҫтар! Донъяның ҡасан да, ҡайҙа ла мөхәббәткә таяныуын, ҡот-осҡос яу ваҡытында ла әҙәм йөрәктәрендә тойғоларға урын ҡалғанлығын иҫбатлайыҡ. «Юлдаш» радиоһының "Бәйләнештә" социаль селтәрендәге рәсми төркөмөндә "Яуҙа яралған мөхәббәт" сәхифәһендә һуғыш бәйләгән йәки айырған яҙмыштар тураһында бәйәндәр кө­тәбеҙ. Редакцияға хаттар яҙырға мөмкин. Адресыбыҙ: Өфө, Ғафури урамы, 9/1, “Юлдаш” радиоһы.