Йондоҙнамә (20 - 26 ғинуар)

һыуғояр (21.01 – 19.02)

Был арала йондоҙҙар бик һаҡ эш итергә ҡуша. Ниҙер ҡылыр алдынан ике түгел, өс мәртәбә уйлап алыуығыҙ хәйерле. Шулай уҡ яңылыш әйткән бер генә һүҙҙең дә араларҙы оҙаҡҡа боҙоуы ихтимал. Ҡайһы бер уй-маҡсатығыҙҙы кисектереп торорға ла тура килер, бәлки.

Балыҡ (20.02 – 20.03)

Аҙна барышында үҙегеҙгә оҡшаған һәм яҡшы таныш булған эштәр менән булышығыҙ. Һәләттәрегеҙҙе күрһәтергә лә форсат булыр. Бәғзеләр ниндәйҙер яңы һөнәргә өйрәнер, аҙаҡтан унан файҙа күрер. Йомала өмөтлө һөйләшеү көтөгөҙ.

Ҡуҙы (21.03 – 20.04)

Һеҙҙең тирәләге ваҡиғаларҙы дөрөҫ аңлау бик мөһим. Кире осраҡта етди хаталар ебәреүегеҙ бар. Өмөттәрегеҙҙең аҡланмауы ла мөмкин. Шаршамбынан һуң барыһы ла ыңғай яҡҡа үҙгәрер. Шулай ҙа ҡыйынлыҡтарҙың сәбәптәрен асыҡлау ҡамасауламаҫ.

Буға (21.04 – 21.05)

Һәйбәт көндәр. Элек ҡыйын күренгән эштәр ҙә еңел барыр. Был арала алған тәжрибәгеҙҙең артабан кәрәге тейер. Шишәмбелә ниндәйҙер дәғүә килеп сығыуы ихтимал, ләкин ул тиҙ онотолор һымаҡ. Кесе йомала ҙур булмаған, матди юғалтыуҙар кисерерһегеҙ, ахыры.

Игеҙәктәр (22.05 – 21.06)

Уңышлы осор. Һис тә уйламаған ҡаҙанышҡа өлгәшерһегеҙ, моғайын. Тик иң етди мәсьәләләргә генә иғтибар биреүегеҙ мөһим. Бер аҙ һүлпән, ялҡауыраҡ кешеләрҙең дә эштәре яҡшы барыр. Бер юлы элек ебәргән хатағыҙҙы ла йәтеш кенә төҙәтә алырһығыҙ.

Ҡыҫала (22.06 – 23.07)

Төрлө ҡыйынлыҡҡа ҡәҙимгенән күпкә йыш осрарһығыҙ. Элек ярҙам вәғәҙә иткән кешеләр ҙә һүҙендә тормаҫ. Шуға ҡарамаҫтан, алдан ҡорған маҡсаттарығыҙҙан баш тартырға ашыҡмауығыҙ дөрөҫ булыр. Әгәр түҙемлек күрһәтһәгеҙ, барыһы ла яйланыр.

Арыҫлан (24.07 – 23.08)

Мәл тормошоғоҙҙо ыңғай яҡҡа үҙгәртеү өсөн уңайлы. Бәләкәйҙән башлап, артабан һис тә артҡа сигенмәүегеҙ, үҙ көсөгөҙгә ышаныуығыҙ мөһим. Аралашыуҙар ҡыуандырыр. Туғандарығыҙ менән дә мөнәсәбәттәрегеҙҙе нығытыу өсөн мөмкинлектәр булыр, моғайын.

Ҡыҙ (24.08 – 23.09)

Мөһим эштәргә иғтибар биреү ауырыраҡ булыр һымаҡ. Төрлө ваҡ-төйәк ҡыйынлыҡ даими ҡамасаулап торор. Кеше йомоштары менән дә булышырһығыҙ. Кесе йомала бүләк көтөгөҙ.

Үлсәү (24.09 – 23.10)

Аҙна һис тә еңел килергә оҡшамай. Яҡындарығыҙ менән уртаҡ тел табыу ауырлашыр. Төрлө дәғүә лә килеп сығыуы бар. Башланған эштәрегеҙҙе тамамлау ҙа еңелдән булмаҫ, нимәнелер иҫәпкә алмауығыҙ ҙа асыҡланыр.

Саян (24.10 – 22.11)

Шишәмбелә ниндәйҙер эш өсөн тәнҡит утына эләгерһегеҙ кеүек. Ул әлбиттә, кәйефегеҙҙе күтәрмәҫ. Ғөмүмән, был арала йыш аҡланырһығыҙ. Шулай ҙа танауығыҙҙы төшөрмәгеҙ. Ваҡыт күп осраҡта һеҙҙең хаҡлы булыуығыҙҙы мотлаҡ күрһәтер.

Уҡсы (23.11 – 21.12)

Маҡсаттарығыҙға ирешеү өсөн тырышырға тура килер. Элек еңел генә барған эштәрегеҙ ҡыйынлыҡ менән башҡарылыр. Ауырлыҡтарға ҡарамаҫтан, алға табан барыуығыҙ мөһим. Ярты юлда туҡтағандар бик күпте юғалтыр. Элекке дуҫтарығыҙҙан ярҙам алырһығыҙ.

Фото: Т.Аманов

Яңылыҡ авторы: Өмөтбай

Йәшлек гәзите.