+24 °С
Ямғыр
Новости
15 Ғинуар 2020, 07:47
“Әү, бәләкәсем!”
Психологтар әйтеүенсә, һигеҙ йәшкә тиклем бала абстракт төшөнсәләр менән эш итә белмәй. Ул үҙе күргән хәлдәрҙән сығып ҡына эш итә. Шуға күрә уға мөхәббәт, нәфрәт, матурлыҡ, насарлыҡ һ.б. тураһында аңлатырға кәрәк. Бәләкәстең күңеленә үтеп ингән хәл-ваҡиғалар ниндәй хис-тойғолар уятыуы хаҡында ҡыҙыҡһынығыҙ.
Мәҫәлән, күрше малайға ҙур машина бүләк иткәндәрен күреп ул ниндәй сәйер хис тойған? Ул нисек атала? Был хисте бөтөрөп буламы? Тормош менән яңы таныша башлаған кескәй йөрәккә йәшәйештең төрлө күренешен ябай ғына итеп, донъяның ыңғай яҡтарын күрһәтеп аңлатырға кәрәк. Баланың кемде яратыуын, кемде оҡшатып етмәүен белешегеҙ, ул кешеләрҙең ниндәй сифаттары өсөн оҡшата һәм яратмай?
Ҡаршыға килгән кешеләрҙе күҙәтеп барығыҙ: ни өсөн был апай моңһоу икән, ә бабай ниңә йылмая? Кешеләрҙе иғтибар менән өйрәнеү – ул яҡындарыңдың күңелен аңлауға бер аҙым. Һеҙ уйын формаһында башлап ебәргән шөғөл арҡаһында бала кешеләрҙе яҡшыраҡ аңлай башлаясаҡ.
Бала ниндәй йәнһүрәт геройын ярата, ни өсөн? Әйткәндәй, үҙегеҙ генә һорау бирмәгеҙ, баланы ла ихласлап тыңлағыҙ. Яуапты белмәһәгеҙ, был хаҡта икәүләп уйланығыҙ.
Бала менән әллә күпме әйбер тураһында һөйләшергә була. Уның ҡыҙыҡһыныуҙары көтөлмәгән темаларҙы килтереп сығарыуы мөмкин. Иң мөһиме, ғүмер буйы йыйған белемдәрегеҙҙе файҙаланып, бәләкәсте оло тормошҡа әҙерләп, уның менән һөйләшегеҙ!
Фото: Т.Аманов
