+22 °С
Ямғыр
Новости
11 Ғинуар 2020, 09:28
Шэрон Стоун Владимир Путин хаҡында нимә тигән?
Американың билдәле актрисаһы Шэрон Стоун үҙҙәренең Дональд Трампы менән беҙҙең Владимир Путинды сағыштырған.
Американдар, ысынын әйткәндә, ҡурҡыу белмәҫ халыҡ. Кеме булһа ла, хатта Президентҡа ҡарата фекерен тура итеп әйтә лә ҡуя. Беҙҙә икенсе төрлөрәк: күбеһенсә “һыуға һөйләйбеҙ” йә “кеҫәнән йоҙроҡ күрһәтәбеҙ”, ”дүрт кешелек табында ҡысҡырынабыҙ”.
Бына әлеге актриса Дональд Трампты, маҡтансыҡ, үҙенең вазифаһын ихтирам итә белмәй, тип әрләгән. Үҙенә төбәп әйтмәгән инде ул да, ә бер журналға интервью биргәндә һөйләгән. Уныһы ла батырлыҡ. Әлеге лә баяғы беҙҙә, билдәле кешенән сәйәси темаға бер нәмә һораһаң, етәкселекте һүгә-һүгә лә, “быны яҙып ҡуймағыҙ”, тип иҫкәртә.
Тағы Стоун ханыма әйләнеп ҡайтабыҙ. Ул: “Мин Путинды үҙ иленең көслө лидеры тип иҫәпләйем”, – тигән. Һәм Дональд Трамптың икенсе мөҙҙәткә һайланыуына шиген белдергән.
Бахыр, Трамп әфәнденән актерҙар көлә. 2018 йылда Арнольд Шварценеггер, Путин менән Трамптың Хельсинкиҙағы осрашыуынан һуң былай тигәйне: “...АҠШ Президенты уның (Путиндың) янында бөрөшөп әсеп бөткән бәләкәй макарон кеүек күренде ...”
Фото: Твиттерҙан.
Яңылыҡ авторы: Алһыу Ишемғолова.
Йәшлек гәзите.
