+22 °С
Ямғыр
Новости
9 Ғинуар 2020, 07:58
Рәдис әсәһе артынан китте...
Яңы йыл төнөндә булған ҡурҡыныс авария тураһында бер нисә тапҡыр яҙғайныҡ инде. Ике ҡатын һәм балалар бергә байрам ҡаршыларға китеп барған ерҙә аварияға осраны. Водитель ҡатын Римма менән уның әхирәте Гөлнара шул уҡ көндә һәләк булды. Римманың өс балаһы дауаханаға эләккәйне.
Кисә бик ауыр яңылыҡ билдәле булды: комала булған ун йәшлек Рәдис иҫенә килмәйенсә һәләк булған. Был турала әсәһенең бер туған ағаһы Алмас Шәкиров хәбәр итә. Балалар Дүртөйлө район дауаханаһында ята ине.
– Рәдис кисә китте. Беҙҙең тауышты ишетеп команан сыҡһын өсөн уның менән көн һайын һөйләшеп ҡараныҡ, тик ул ишетмәне. Йәрәхәттәре бигерәк ауыр булды шул. Көнө-төнө доғалар уҡый инек... – ти Алмас.
Рәдис менән Радим - игеҙәктәр, улар бер-береһенә бик бәйләнгән. Авария көнөнән алып улар икеһе лә дауаханала ауыр хәлдә ине. Әле Радим һауыға башлаған, уны реанимациянан һеңлеһе, биш йәшлек Азария янына күсергәндәр.
– Беҙ балаларға бер нимә лә әйтмәнек әле. Улар әсәһенең дә, ағаларының да һәләк булғанын белмәй. Был бигерәк ауыр. Балалар улар тураһында һораша. Беҙ шым ҡалабыҙ, – ти Алмас.
Рәдисте иртәгә әсәһе янына ерләйәсәктәр.
Хәтерегеҙгә төшөрәбеҙ, был авария 31 декабрҙә Дүртөйлө районында булғайны. Унда “ВАЗ-2113”, “Шевроле Лачетти”, “Киа Рио” һәм “Камаз” автомобилдәре бәрелешкәйне. Ике ҡатын үлеүе сәбәпле биш бала тома етем ҡалғайны. Хәҙер улар дүртәүгә ҡалды...
Фото: Уфа1
Автор: Альфия Мингалиева.https://bash.rbsmi.ru/articles/kh-ef-e-lek/R-dis-s-e-artinan-kitte-66632/
