+22 °С
Ямғыр
Новости
27 Декабрь 2019, 08:45
Ҡыҙ баланы кәмһетеп, ҡурҡытып...
Өфөлә өлкән класс уҡыусылары башланғыс мәктәп уҡыусыһын яфалаған.
Был хәл тураһында республика Башлығы ҡарамағындағы Кеше хоҡуҡтары советы ағзаһы Динар Зәйнуллин социаль селтәрҙәрҙәге үҙ битендә хәбәр иткән. Уға ярҙам һорап ҡыҙҙың әсәһе мөрәжәғәт иткән.
Ул өлкән класс уҡыусыларының баланы туҡмауын, ҡурҡытыуын һәм үҙ-үҙен үлтереүгә өндәүҙәрен белдергән. Ҡыҙ оҙаҡ ваҡыт әсәһенә был аяныслы хәл тураһында һөйләргә батырсылыҡ итмәгән.
Әлеге хәл ағымдағы йылдың октябрендә булған. Хәҙер, әсәһе һүҙҙәренә ҡарағанда, ҡыҙҙы интектереүселәрҙең ҡайһы берҙәренең шәхестәре асыҡланған, әммә әле бик күп һорауға аныҡлыҡ индереү талап ителә.
Зыян күреүсе бала уҡыған мәктәптә уның ата-әсәһе яғынан социаль педагогҡа телдән мөрәжәғәт булыуын раҫлағандар. Шул уңайҙан видеокүҙәтеү камераларынан яҙмалар тикшерелгән, шулай уҡ мәктәптең бер нисә уҡыусыһынан һорау алғандар. Әммә, директор урынбаҫары һүҙҙәренә ҡарағанда, ҡыҙҙы мәсхәрәләү осраҡтары асыҡланмаған.
Билдәле булыуынса, хәҙер ҡыҙ өй шарттарында белем ала. Ата-әсәләр хоҡуҡ һаҡлау органдарына ғариза яҙып һалғандар. Әле был ваҡиға буйынса тикшереү эше бара.
Фото: "Бәйләнештә".
Автор: Самат Ғәлинhttps://bash.rbsmi.ru/articles/y-m-i-t/i-balani-k-m-etep--ur-itip-52593/
