+22 °С
Ямғыр
Новости
15 Декабрь 2019, 06:55
"Генерал" салаты
Эштән арып ҡайтҡас, өй йылыһын тойоу - тормошта ҙур бәхеттәрҙең береһе. Киске мул табын кәйефте тағы ла күтәреп ебәреүсән. Ошондай салаттар ҙа әҙерләнһә... Ашығыҙ тәмле, кистәрегеҙ йәмле булһын!
"Генерал"ды мотлаҡ ыҫланған тауыҡтан әҙерләргә кәрәк. Шулай итеп, беҙгә ярты килограмм ыҫланған тауыҡ, бешерелгән өс кишер, сөгөлдөр, биш йомортҡа, 150 грамм ҡаты сыр, 100 грамм грек сәтләүеге, 2-3 тырнаҡ һарымһаҡ, майонез кәрәк буласаҡ.
Тәүҙә кишерҙе, сөгөлдөрҙө, йомортҡаны бешереп, әрсеп, эре ҡырғыс аша үткәрәбеҙ. Шунан һарымһаҡты ваҡлап майонез менән бергә бутайбыҙ. Тауыҡ итен ҙур булмаған киҫәктәр итеп турайбыҙ. Ә сырҙы ваҡ ҡырғыс аша үткәрергә кәрәк. Сәтләүекте лә ваҡлайбыҙ.
Салатты йыя башлайбыҙ. Беренсе ҡатламына - ыҫланған тауыҡ ите. Икенсеһенә - йомортҡа, өсөнсөһөнә - кишер, аҙаҡҡыға - сөгөлдөр. Һәр ҡатламға майонез һалабыҙ. Сыр һибәбеҙ. Иң аҙаҡтан грек сәтләүеге һәм йәшеллек менән биҙәргә кәрәк. Бер нисә сәғәткә һыуытҡысҡа ултыртып торабыҙ. Майонез һеңергә тейеш. Ашығыҙ тәмле булһын!Фото: Ok.ru Автор: Рисаля Юмагулова
