Бик ашағы килһә…

- Ҡарбуз ашағы килеү бөйөр һәм бәүел ҡыуығы ауырыуҙарына бәйле булыуы ихтимал. Был емеш бәүел ҡыуыу үҙенсәлегенә эйә, шул уҡ ваҡытта организмға кәрәкле калийҙы юғал­тыуҙан һаҡлай.

- Кәбеҫтә ашағы килеү ашҡаҙан-эсәк тракты менән бәйле проблемалар хаҡында иҫкәртеүе мөмкин. Ундағы күҙәнәклек эсәктәрҙең тонусын күтәрә, тартрон кислотаһы ашты эшкәртергә ярҙам итә, U витамины сей яраларҙың бөтәшеүенә булышлыҡ итә.

- Лимон ашағы килеү үт ҡыуығы һәм бауырҙағы проблемаларға бәйле була. Цитрус аш эшкәртеү һуттарының бүленеп сығыуын көйләй, С витамины ялҡынһыныуҙы бөтөрөп, бактерияларҙы үлтерә.

- Шоколад ашағы килеү тиҙ арыуҙан һәм депрессиянан була. Унда кәйефте күтәреүсе флавоноидтар бар, какао шатлыҡ гормоны – серотонин бүленеп сығыуға булышлыҡ итә.

- Эремсек ашағы килһә, тимәк, организмға кальций кәрәк. Был осраҡта остеохондроз, артроз, артрит кеүек сирҙәргә тикшерелеү зыян итмәҫ.

- Ҡан баҫымы түбән булғанда сыр ашағы килә. Тоҙло, майлы сыр ҡан баҫымын күтәрә.

- Иммунитет ҡаҡшап, энергия етмәгәндә туҡтауһыҙ ит ашағы килә. Ундағы аҡһым менән тимер организмға көс һәм энергия биреүсе иммун күҙәнәктәрен тергеҙеү өсөн кәрәк.

- Балыҡ ашағы килеү нервы һәм аҡыл көсөргәнешенән булыуы ихтимал. Балыҡта фосфор һәм тимер күп, улар нервы системаһы һәм мейе эш­мәкәрлеген яҡшырта.

- Алма һәм ҡауын ашағы килгәндә, йөрәк һәм ҡан тамырҙарына, ҡандағы холестеринға иғтибар итергә кәрәк. Был емештәрҙә пектин һәм күҙәнәклек күп. Улар организмдан холестеринды сығара, тромб барлыҡҡа килеү хәүефен кәметә, йөрәк-ҡан тамырҙары системаһына ыңғай тәьҫир итә.

- Аппетиттың юғалыуы В1 һәм В3 витаминдарының, марганец һәм хлор­ҙың етмәүе хаҡында һөйләүе ихтимал.

- Туҡтауһыҙ гранат ашағы килеү гемоглобиндың түбәнәйеүен күрһәтә.

- Зәйтүн емеше ашарға яратҡан кешеләргә эндокрин системаһы эшмәкәрлегенә иғтибар итергә кәрәк. Унда йод күп. Билдәле булыуынса, организмға йод етмәгәндә, ҡалҡан биҙе гормондарҙы етерлек кимәлдә бүлеп сығара алмай.