+22 °С
Ямғыр
Новости
6 Октябрь 2019, 10:07
Теләүембәттәр ФАП-ҡа рәхмәтле
Теләүембәт ауылы районда ҙурҙарҙан һанала. Ауыл биләмәһенә бөгөн ете ауыл инә, йәмғеһе 2480 кеше бында көн итә. Ә Теләүембәттә, мәҫәлән, 430 халыҡ йәшәй. Ауылда яҡшы тормош алып барыу өсөн социаль объекттарҙан мәктәп, балалар баҡсаһы, мәсет, клуб, китапхана эшләй. Ауыл халҡына тәүге медицина ярҙамы күрһәтеүҙә, әлбиттә, фельдшер-акушерлыҡ пунктының әһәмиәте әйтеп бөткөһөҙ.
Әле ауылдың ҡап уртаһында төҙөлөш ҡыҙыу бара, төҙөүселәр уны ноябрь айында файҙаланыуға тапшырырға күҙаллай. Шуға ла улар намыҫ менән бөгөн заманса материалдар ҡулланып, бинаның стенаһын күтәреү, тирә-яғын төҙөкләндереү менән мәшғүл. Бөтә коммуникациялар үткәрелгән.
Бинаның эсендә фельдшер бүлмәһе, процедуралар кабинеты, көтөп ултырыу урыны, гардероб һәм санузел ҡаралған. Төҙөлөш хаҡы – ике миллион һум тирәһе.
“Ауыл биләмәләрен тотороҡло үҫтереү” маҡсатлы программаһы нигеҙендә төҙөлгән учреждение заманса талаптарға тулыһынса яуап бирәсәк. Заказсыһы – Башҡортостан Ауыл хужалығы министрлығы, ә подрядсыһы иһә Мәләүез ҡалаһының “Нур” яуаплылығы сикләнгән йәмғиәте. Әйткәндәй, “Нур” йәмғиәтенең етәксеһе – ошо ауыл биләмәһенә ҡараған Аҙнағол ауылы егете Салауат Хәлил улы Кинйәбулатов.
