+22 °С
Ямғыр
Новости
2 Октябрь 2019, 10:45
Бында малсылыҡ мегафермаһы буласаҡ!
Ҡалтасы районында 1200 баш һыйырға иҫәпләнгән заманса малсылыҡ комплексы төҙөлә. Ноябрҙә Даниянан фермаға тәүге малдарҙың ҡайтыуын көтәләр. 100 баш тоҡомло һыйыр малын урынлаштырыу өсөн әле биналар әҙер, мал аҙығы күптән инде хәстәрләнгән. Өс мең тонна сенаж һаҡлауға һалынған. Республика өсөн әһәмиәтле проекттың тәүге өлөшө декабрь айында сафҡа инәсәк.
Проектты тормошҡа ашырған “Победа” яуаплылығы сикләнгән йәмғиәте майҙансығы хәҙер ҙур төҙөлөштө хәтерләтә. Эш хаҡы 2,3 миллиард һум тәшкил итә. Ҡалтасынан тыш, Борай һәм Яңауыл райондарында ла киләсәктә биш мең баш һыйыр малы булған яңы ҙур фермалар барлыҡҡа киләсәк.
Әлеге ваҡытта малсылыҡ комплексының беренсе сираттағы төҙөлөшөндә Удмурт Республикаһының “Сельстрой” яуаплылығы сикләнгән йәмғиәте төҙөүселәре эшләй. Ҡеүәтле техника килтерелгән, электр үткәргесе һуҙылған, төҙөлөш материалдарына ҡытлыҡ юҡ, уның менән ваҡытында һәм тотҡарлыҡһыҙ тәьмин итәләр. Бөгөн бында 80 кеше эш менән мәшғүл, эшселәр бөтә уңайлыҡтары булған торлаҡ менән тәьмин ителгән. Ҡалтасынан, Яңауылдан, Удмуртиянан килеп эшләйҙәр.
– Шөкөр, төҙөлөш ҡыҙыу тиҙлектә ойошторолған, етәкселек тә мега ферманың ваҡытында тапшырылыуы өсөн бар көсөн һала. Бер генә үтенесебеҙ ҙә иғтибарһыҙ ҡалмай, – ти төҙөлөштөң прорабы Руслан Мәғәсүмов.
Бөгөн егеттәр ферманың тирә-яғын төҙөкләндереү, асфальт һалыу, стеналарын биҙәкләү, йылытыу һәм нығытыу кеүек эштәр менән мәшғүл. Бынан тыш, технологик ҡоролмаларҙы урынлаштырыу эшен дә алып баралар. Тағы ла иркен келәттәрҙең нигеҙе күтәрелә.
Ҡыуаныслы күренеш: оҙаҡламай был урында заманса ҡорамалдар менән йыһазландырылған яңы малсылыҡ комплексы эшләй башлаясаҡ. Проектты тормошҡа ашырыу өсөн яҡшы логистика менән уңайлы ер участкаһы һайланған, дәүләт экспертизаһы һығымталары, төҙөү эштәренә рөхсәт бар, төҙөлөш һәм ҡорамалдар менән тәьмин итеү буйынса килешеүҙәр төҙөлгән.
Тимәк, ауыл хужалығы тармағы менән яҙмышын бәйләргә теләгәндәргә Ҡалтасы районында эш буласаҡ, уларҙың хеҙмәте арҡаһында беҙҙең өҫтәлдәр сифатлы, экологик яҡтан таҙа һөт ризыҡтары менән байытыласаҡ.
