“Минең айыҡ атай-әсәй менән йәшәгем килә”

Был проект “Минең ғаиләм” тип атала. Уны башлауға арнап үткәрелгән сарала Лилиә Салауат ҡыҙы белдереүенсә, йыл һайын етемгә әйләнгән балаларҙың 70 проценты – “социаль етемдәр”.

– Социаль етемлектең сәбәбе һәр ваҡыт тиерлек бер. Ул – алкоголизм. Тап ошоноң өсөн беҙ барлыҡ көстәрҙе берләштерергә һәм һәр сабыйға үҙенең тыуған ғаиләһен һаҡлап ҡалырға ярҙам итергә булдыҡ, – тине ул.

Проект иҫерткес эсемлектәрҙе күпләп ҡулланған ата-әсәне реабилитациялауға йүнәлтеләсәк. Социаль приюттарға урынлаштырылған балаларҙың ата-әсәһенә ашығыс рәүештә ярҙам күрһәтеләсәк. Быйыл республиканың ошондай приюттарына 407 бала ҡабул ителгән.

Лилиә Ғүмәрова белдереүенсә, “Минең ғаиләм” проекты сиктәрендә бындай ата-әсәләрҙең 80 процентын дауалау мөмкин буласаҡ. Проектҡа ярашлы махсус хеҙмәткәрҙәр бындай ғаиләләрҙе асыҡлаясаҡ, уларҙы дауаланырға өгөтләйәсәк. Ғаиләне социаль оҙатыуҙың шәхсән программаһы эшләнәсәк – уларға эшкә урынлашырға ярҙам күрһәтәсәктәр, сабыйҙарын балалар баҡсаһына, мәктәпкә, түңәрәктәргә һәм секцияларға урынлаштырыуға булышлыҡ итәсәктәр.

– Был эш бик ҡатмарлы. Беҙҙең пландарға ярашлы, проектта ҡатнашыусыларҙың 75 проценты самаһы дауаланыу курсы һәм социаль реабилитация үткәндән һуң ремиссия хәлендә буласаҡ. Был проектҡа барыһы ла – муниципалитеттар, ауыл советтары, мәктәптәр, дауаханалар, күршеләр, ата-әсәләр ҡушылыр тип өмөт итәбеҙ.

Бындай эштең һөҙөмтәһе булып айыҡ ата-әсә менән үҙ ғаиләһендә бәхетле йәшәгән йөҙәр, меңәр бала торор тип ышанабыҙ, – тине сенатор. https://bash.rbsmi.ru/articles/sotsial-m-s-l/mine-ayy-atay-s-y-men-n-y-sh-gem-kil-/