+22 °С
Ямғыр
Новости
25 Декабрь 2018, 08:14
Янғындар йышая
Үҙенең матурлығы менән ҡыш миҙгеле кеше өсөн мәшәҡәттәр ҙә, хатта хәүеф тә тыуҙыра. Сатлама һыуыҡтарҙа кемдер өйҙәрен йылытыу ниәтенән төрлө ҡорамалдар ҡуллана. Уларҙы һаҡһыҙ ҡулланыу бәлә-ҡазаға килтерә.
Мәҫәлән, ошо декабрь айында беҙҙең районда бер нисә йортта янғын сыҡты. Ибраҡай ауылынан өс балалы Ибәтуллиндар ғаиләһенең өйө ныҡлы зыян күрҙе. Ә Тәтер-Арыҫлан ауылында ағас өй көл-күмергә әйләнде. Һөҙөмтәлә, сатлама һыуыҡта ошо өйҙәрҙә йәшәүселәр бер кейемһеҙ урамда ҡалды.
Һаҡланғанды Хоҙай һаҡлар, тигән мәҡәл бар халыҡта. Алда яңы йыл байрамы. Яңы йыл тик шатлыҡлы ваҡиғалар килтерһен өсөн алдан уҡ хәстәрлек күрәйек. Бының өсөн йорт электр селтәрен һәм ҡорамалдарҙы тикшереп сығырға ваҡыт табығыҙ. Тик заводта әҙерләнгән йылытыу приборҙарын ҡулланырға кәрәк. Ә пиротехник изделиеларға килгәндә, янғын хәүефһеҙлеген тәьмин итеү саралар комплексын тулыһынса үтәргә кәңәш итәләр.
