Фәнзил Сыңғыҙов Башҡортостан Хөкүмәте Премьер-министры урынбаҫары итеп тәғәйенләнде

Бынан алда Башҡортостан Башлығының икенсе Указы менән Николай Хорошилов Башҡортостан Республикаһының алтынсы саҡырылыш Дәүләт Йыйылышы – Ҡоролтай депутаты итеп һайланыуына бәйле Башҡортостан Республикаһы Премьер-министры урынбаҫары вазифаһынан бушатылды.

Шулай уҡ Башҡортостан Башлығы Рөстәм Хәмитов «Башҡортостан Республикаһы Хөкүмәтендә бурыстарҙы билдәләү тураһында»ғы бойороҡҡа үҙгәрештәр индерҙе.

Документҡа ярашлы, быға тиклем Николай Хорошилов ҡарамағындағы торлаҡ-коммуналь хужалыҡ өлкәһендә дәүләт сәйәсәтен тормошҡа ашырыу мәсьәләләре Башҡортостан Хөкүмәте Премьер-министры урынбаҫары Андрей Труханға тапшырылды.

Фәнзил Сыңғыҙов мәктәпкәсә, дөйөм, башланғыс, урта, юғары, вуздан һуң профессиональ, өҫтәмә белем биреү, мәҙәниәт, мәҙәни мираҫ объекттарын һаҡлау, файҙаланыу, популярлаштырыу һәм дәүләт һаҡлауы мәсьәләләре өсөн яуаплы. Уның ҡарамағына Башҡортостан Мәҙәниәт министрлығы, Мәғариф министрлығы; Мәғариф өлкәһендә контроль һәм күҙәтеү идаралығы, Мәҙәни мираҫ объекттарын дәүләт һаҡлауы идаралығы тапшырыла.

2011- 2018 йылдарҙа Фәнзил Сыңғыҙов Башҡортостан Республикаһының Ҡырмыҫҡалы районы башлығы булып эшләне.