+22 °С
Ямғыр
Новости
29 Август 2018, 08:09
Өфөләге сауҙа үҙәгендә билдәһеҙ егет ҡыҙға энә менән сәнскән — полиция тикшереү эштәре алып бара
Өфөлә, Менделеев урамында урынлашҡан сауҙа үҙәгендә, 27 августа көндөҙ билдәһеҙ егет ҡыҙға энә менән сәнскән. Социаль селтәргә ошо хаҡта мәғлүмәт һәм видеокүҙәтеү камераларынан енәйәтсенең фотоһы һалынған.
Хәбәрҙең авторы яҙыуынса, зыян күргән ҡыҙ полицияға ғариза менән мөрәжәғәт иткән. Яҡынса мәғлүмәттәр буйынса, бөгөн экспертиза һөҙөмтәләре билдәле була.
«Фотоға күберәк репост яһауығыҙҙы үтенәбеҙ – был кешене табырға кәрәк», — тип саҡыра яҙма авторы һәм ошо егет тураһында ниндәйҙер мәғлүмәткә эйә булған кешеләр шылтыратһын өсөн телефон номерын ҡалдырған (фотоның оригиналы һәм телефон номеры һылтанма буйынса бирелгән).
«Башинформ» агентлығына республика Эске эштәр министрлығының матбуғат хеҙмәтенән хәбәр итеүҙәренсә, полицияға ғариза килгән. Ул ҡабул ителгән.
«Енәйәт эшен ҡуҙғатыу тураһында мәсьәлә хәл ителә. Әлеге осраҡ буйынса тикшереү бара», — тине ведомство вәкиле.
"Башинформ".
