+21 °С
Болотло
Новости
9 Август 2018, 07:53
Республикабыҙ райондарының береһенә телевидение хеҙмәткәрҙәренең «һанлы десанты» төшә
Бөгөн, 9 августа, Дыуан районының Мәсәғүт ауылына «Башҡортостан» дәүләт телерадиокомпанияһының «һанлы десанты» төшә. Башҡортостан телевидениеһы һәм радиоһы журналистары ауыл райондарында йәшәүселәрҙе һанлы телевидениеның үҙенсәлектәре менән таныштырыу өсөн республика район-ҡалалары буйлап турға сыға. 2019 йылдың ғинуарынан аналоглы телевидение яйлап бөтә башлай, шуға «һан»ға тоташырға кәрәк, тип хәбәр иттеләр «Башҡортостан» дәүләт телерадиокомпанияһынан.
«Һанлы десант» составында ауыл халҡына билдәле тележурналистар һәм радио алып барыусылары Айгөл Кантюкова һәм Фирҙәт Ғәлиев бара. Урындағы артистар ҡатнашлығындағы байрамда «Рәсәй Башҡортостан» телеканалының ижади төркөмө эшләй. Әүҙем ҡатнашыусылар һанлы телевидениеға тоташыу өсөн приставка менән бүләкләнә. Төп приз — телевизор. Шулай уҡ башҡа бик күп бүләктәр һәм сюрприздар көтөлә. Байрам Мәҙәниәт һарайы янында киске сәғәт 5-тә башлана.
«Һанды ҡабыҙ!» акцияһы барышын «Рәсәй 1 Башҡортостан» һәм «Рәсәй 24 Башҡортостан» телеканалдарында «Хәбәрҙәр — Башҡортостан» программаһы эфирында күҙәтергә мөмкин. Ижади «һанлы десант» төшөүенең тулы версияһы — «Рәсәй 1» телеканалында «Хәйерле иртә, республика!» тапшырыуында.
"Башинформ".
