+21 °С
Болотло
Новости
29 Май 2018, 08:13
Өфөлә Балаларҙы яҡлау көнөндә ҡайҙа барырға?
1 июндә бөтөн донъя Балаларҙы яҡлау көнөн билдәләй. Был көндө Башҡортостандың баш ҡалаһыда «Өфө – балалыҡ биләмәһе» девизы аҫтында төрлө саралар үтә.
«Башинформ» агентлығы 1 июндә Өфөлә бала менән барырға мөмкин булған майҙансыҡтар йыйылмаһын баҫып сығара.
ИНТЕРАКТИВ МАЙҘАНСЫҠ
Иртәнге сәғәт 11-ҙән киске 6-ға тиклем Салауат Юлаев исемендәге майҙанда балалар һәм уларҙың ата-әсәләре өсөн ҡала мәғариф, мәҙәниәт, сәнғәт, спорт учреждениеларының һәм башҡа ойошмаларҙың ҡаҙаныштар һәм ижад күргәҙмәһен тәҡдим итәләр.
— әүәләү, оригами, роботехника буйынса оҫталыҡ дәрестәре;
— йәнһүрәт геройҙары менән уйындар;
— фотозона;
— төрлө һөнәрҙәрҙең импровизация бүлмәләре;
— концерт программаһы.
ӨФӨ РАЙОНДАРЫНДА БАЙРАМ ПРОГРАММАЛАРЫ
Дим районы: мәҙәниәт һәм ял паркында «Һаумы йәй – балалыҡ байрамы» байрам программаһы уҙа.
Калинин районы: байрам программаһы «Беренсе май» мәҙәниәт һәм ял паркында ойошторола.
Киров районы: байрам саралары Ленин исемендәге паркта үтә.
Ленин районы: «Йәдкәр» мәҙәниәт йортонда, «Тулҡын» паркында, Мостай Кәрим скверында байрам ойошторола.
Октябрь районы: байрам «Ҡашҡаҙан» паркында, Нуғай ҡасабаһы мәҙәниәт йортонда һәм «Тылсымлы донъя» паркында ойошторола.
Орджоникидзе районы: байрам программаһы Нефтехимиктар паркында була.
Совет районы: байрам саралары Яҡутов исемендәге паркта ойошторола.
