Мауыҡтырғыс шашка уйыны

Йыл һайын өлкән һәм мәктәпкә әҙерләү төркөмө балалары шашка ярыштарында ҡатнаша. Күптән түгел сираттағы турнир үтте. Ошо сара алдынан йәш интеллектуалдар бик тулҡынланды һәм борсолдо! Әммә тәүҙә һәр төркөмдән иң көслөләрҙе асыҡлау һәм уларҙы конкурс финалында күрһәтеү өсөн һайлап алыу турҙары үтте.

Һәм бына - финал. Һәм беҙ йәнә һәр уҡыусының ҡомарын һәм еңеүгә ынтылышын, ата-әсәләрҙең тулҡынланыуын, тәрбиәләнеүселәрҙең тәрбиәселәре өсөн борсолоуҙарын күрәбеҙ.

Турнир барлыҡ ҡағиҙәләр буйынса үтте: компетентлы жюри, арбитрҙар, тамашасылар, хуплаусылар төркөмө. Шәхси эшҡыуар Филүс Рысаев сараның бағыусыһы булды. 18 тәрбиәләнеүсе беренселек өсөн лайыҡлы ярышты һәм ҡыҙыҡлы һәм көсөргәнешле уйын күрһәтте.

Турнирҙың барлыҡ этаптарын үткәндән һуң, тиңдәшле рәүештә, беренсе, икенсе, өсөнсө урындар яулаған Элдан Иҫәнбәтов, Замир Хәлиуллин, Тимур Дәминов лайыҡлы еңеүселәр булды. Ҡатнашыусылар Дипломдар, сертификаттар һәм бағыусынан тәмле приздар менән бүләкләнде (һүрәттә). Бүләкләү тантанаһында ихлас шатланған балаларҙың хис-тойғолары ташып торҙо.

Билдәләп үтергә кәрәк, ағымдағы йылда тәүге тапҡыр учреждение хакимиәте балалар баҡсаһы профсоюз комитеты менән берлектә хеҙмәт коллективы хеҙмәткәрҙәре араһында ла ошондай уҡ турнир ойошторҙо. Үҙ көсөн һынап ҡарарға теләүселәр аҙ булманы. Ярыш йылы, дуҫтарса мөхиттә үтте. Ярышта еңеүселәргә һәм призерҙарға Дипломдар һәм сувенирҙар тапшырылды. Ҡатнашыусылар ошондай сараларҙы йышыраҡ ойошторһондар ине тигән теләк белдерҙе.

Шашка уйыны балаларҙа логик фекерләүҙе, хәтер, фантазияны үҫтерә, түҙемле, ныҡышмалы, тыныс булырға, күп нимәне иҫтә ҡалдырып, киләсәктә ҡулланырға, еңеүгә ынтылыш, лайыҡлы еңә һәм еңелә белергә өйрәтә.

Гөлназ САБИТОВА, 1 һанлы балалар баҡсаһы педагог-психологы.