+21 °С
Облачно
Новости
6 Февраля 2018, 06:01
Республикала Рима Баталованың V йәмәғәт премияһына конкурс башланды
Башҡортостанда Рима Баталованың V йәмәғәт премияһына конкурс башланды. Акцияны «Милләт йәштәре» төбәк йәмәғәт фонды үткәрә. «Был инде бишенсе, юбилей тантанаһы. Конкурсҡа ҡыҙыҡһыныуҙың йылдан-йыл арта барыуына шатланам. Был юлы ҡатнашыуға ғаризалар тағы ла күберәк булыр һәм беҙ яңы исемдәр асырбыҙ, яңы лайыҡлы кешеләр, заманыбыҙҙың ысын геройҙары менән танышырбыҙ тип ышанам», — тине Рима Баталова.
Конкурс ғәҙәттәгесә мөмкинлектәре сикләнгән йәш спортсыларҙы, тренерҙарҙы, инвалид балаһы булған йәш спорт ғаиләләрен, хәйриәтселәрҙе, шулай уҡ инвалидтарҙың мәсьәләләрен яҡтыртҡан киң мәғлүмәт сараларын дәртләндереүгә өндәлгән. Еңеүселәр ете номинацияла билдәләнәсәк: «Йыл асышы», «Сикһеҙ спорт», «Паралимпия спорты өмөтө», «Еңеү сере», «Чемпион тәрбиәләү», «Йөрәк саҡырыуы буйынса», «Асыҡ ҡараш».
Биш йыл эсендә премия тапшырыу республика өсөн мөһим сараға әйләнде. Был – инвалидтарҙың проблемаларына битараф ҡалмаусыларҙы берләштереүсе ваҡиға. Ул – йыл буйына ныҡышмалы эшләгән, танылыуға һәм хөрмәткә лайыҡлылар майҙансығы. Премия республика Хөкүмәте һәм бөтә спорт берләшмәһе, паралимпия хәрәкәте вәкилдәре һәм инвалид балалар тәрбиәләүсе ата-әсәләр тарафынан юғары баһа алған.
Конкурста ҡатнашыу өсөн тултырылған ғаризаны fond.batalova@gmail.com тигән электрон почтаға ебәрәргә кәрәк. Тултырыу өсөн форманы «Милләт йәштәре» фонды сайтында (www.batalovafond.ru) табырға мөмкин. Ғаризалар 5 февралдән 5 мартҡа тиклем ҡабул ителә. Белешмәләр өсөн телефон: (347) 276-20-36, электрон почта: olga.fond.rb@mail.ru. "Башинформ".
