Һөйәрембәтовтарҙың мөхәббәт һәм ғаилә тарихы

Улар 2002 йылда педагогия институтының ятағында таныша. Студент йылдары онотолмаҫ, күңелле осор. Тап шул ваҡытта Илдар һәм Динара осраша. Уларҙың тормошо йәшәү дәрте, һәм пландар менән тулы була. Яҙмыш уларҙы ҡауыштыра.

Диплом алғас, Илдар тыуған ауылы Ҡабыҡҡыуышҡа ҡайта. Был аңлы аҙым: бында уның тамырҙары, бында уның тәғәйенләнеше. Динара иһә уҡыуын дауам итә. Шулай итеп, күрше Федоровка районы ҡыҙы Ҡабыҡҡыуыш ауылына килен булып төшә, тыуған ауылы кеүек күңеленә яҡын.

Тәүге туғыҙ йылда Һөйәрембәтовтар ата-әсәһе менән бергә йәшәй. Был аҡыл, кәңәш һәм быуындар берҙәмлеге йылдары була. Һәм йәштәр үҙ йорто тураһында хыялланып, төҙөлөш башлай.

Уларҙың йорто ҙур, ике ҡатлы, ныҡлы. Был төҙөлөштә шуныһы иғтибарға лайыҡ, төҙөүселәр йорттоң стеналарын ғына күтәрә, ә башҡа эштәрҙе - ҡыйыҡ, биҙәү эштәрен, иҙәндәр, ике яҡлап та туғандарының көсө менән башҡарыла. Был йорт берҙәм хеҙмәт, үҙ-ара аңлашып эш итеү һөҙөмтәһендә барлыҡҡа килгән тип әйтһәң дә була. Йорт алдында ҡаралтылар - һарай, мунса, гараж төҙөлөп мал-тыуар барлыҡҡа килгәс, Һөйәрембәтовтар тулыһынса ауыл тормошо менән йәшәй башлай.

Бөгөн Илдар Минеғаяз улы уҡытыусы ғына түгел, ә мәктәп директоры. Һигеҙ йыл Ҡабыҡҡыуыш урта мәктәбен ышаныслы етәкләй. Етәксе булыу ҙур яуаплылыҡ, һәм уның эргәһендә һәр ваҡыт ышаныслы тылы, терәк-таянысы Динара Ринат ҡыҙы тарих уҡытыусыһы һәм тәрбиә эштәре буйынса директор советнигы. Улар педагогик кәңәшмәләрҙә лә, тәнәфестәрҙә лә, ғаилә менән киске ашта ла бергә.

Һөйәрембәтовтарҙың лайыҡлы алмашсылары үҫә. Өлкән улдары Әлмир Өфө дәүләт нефть техник университетында электр энергетикаһы нескәлектәрен өйрәнә. Алмаз һигеҙенсе класта уҡый. Технологик белемгә ынтыла, шул уҡ ваҡытта йырлай ҙа, бейей, роботтар төҙөй, ул ҙур кимәлдә көсөн һынап ҡарай, "Робофест" республика конкурсында ҡатнаша. Кесе улдары Илмир ата-әсәһенең ярҙамсыһы булып үҫеп килә, ауылда хужалыҡ тотмайынса йәшәп булмауын яҡшы аңлай.

Ауыл ситендәге йорттары улар өсөн ныҡлы ҡәлғә, тирә-яҡта йәмле туғай, ихата тулы ҡош-ҡорт. Йәй улар өсөн ҡыҙыу осор, бергәләп бесән әҙерләгәндәр. Техника булһа ла, берҙәм эшләүгә ни етә. Аталары улдарын хеҙмәткә өйрәтә.

Һөйәрембәтовтар тормош мәғәнәһен бергә булыуҙа, ярҙам итеп, аңлашып йәшәүҙә тип һанай. Уларға ҡарап, ныҡлы ғаилә - бер маҡсатҡа ынтылыуҙа, киләсәккә дөйөм пландар ҡороп йәшәүҙә икәнен аңлайһың. Һөйәрембәтовтар студент йылдарында танышып һоҡланғыс ғаилә ҡороп, балалар үҫтереп, бер-береһенә терәк-таяныс булып районда башҡаларға өлгө булып йәшәүен дауам итә.

Фаягөл ЙОСОПОВА.  Рөстәм ЙӘҒӘФӘРОВ фотоһы.