+11 °С
Ясна
Бөтә яңылыҡтар
Яҡташтарыбыҙ ижады
17 Апрель 2018, 17:42
Күндрәк буйы
Мәғрифә Рафиҡова 1949 йылда Мәләүез районы Дәүләтҡол ауылында тыуып үҫкән. Ул тәүҙә Ишембай ҡалаһындағы 2-се интернат-мәктәбен, хәҙерге З.Вәлиди исемендәге гимназияны тамамлағас, Салауат педагогия училищеһына уҡырға инә. Хеҙмәт юлын Йәлембәт урта мәктәбендә башланғыс кластар уҡытыусыһы булып башлай һәм хаҡлы ялға сыҡҡансы һайлаған һөнәренә тоғро ҡалып, 35 ийыл буйына балаларға аң-белем өләшә. Ижад итергә ярата. Шиғырҙар яҙа. Һеҙҙең ҡарамаҡҡа Мәғрифә апайҙың бер нисә шиғырын тәҡдим итәбеҙ.
Күндрәк буйы
Һиндә тыуып, һиндә үҫмәһәм дә
Ризыҡтарым һиндә булғандыр.
Күндрәк буйҙарында йәшәгәнгә
Күңелдәрем моңға тулғандыр.
Килен булып төшкән саҡтан алып,
Уның һыу буйҙарын яраттым.
Шифалы һыуҙарында ҡойоноп
Барлыҡ һағыштарҙы тараттым.
Күндрәк буйҙарында туғайҙар күп,
Бер туғайы уның баланлыҡ.
Бер туғайы муйыл, икенсеһе -
Туҡһан сиргә дауа - андыҙлыҡ.
Тауҙарында ҡыҙыл сәкмән еләк,
Тал араһы күм-күк бөрлөгән.
Гөлйемеше ҡыҙарып бешә көҙөн,
Йыйып ҡарағыҙсы бер генә.
Йылғаһында көмөштәй балыҡтар,
Күлдәрендә ап-аҡ томбойоҡ.
Ҡояш нурҙарына иркәләнеп,
Ултыралар тып-тыныс ойоп.
Бер ниндәй ял йорто алмаштырмаҫ,
Күндрәк буйҙарында хозурлыҡ.
Шундай гүзәл яҡта йәшәүҙәре,
Үҙе ни тора бит - ғорурлыҡ!
Ағас баштарында аҫыл ҡоштар,
Моң һуҙалар төрлө телдәрҙә.
Ләззәтләнеп ял итәһең кеүек,
Күҙ күрмәгән йыраҡ илдәрҙә.
Тыуған яғым
Бәләкәйҙән бергә уйнап үҫкәс,
Таралыштыҡ төрлө яҡтарға.
Әллә ниңә форсат булманы шул,
Тыуған яҡҡа йышыраҡ ҡайтырға.
Һағындыра күрше-күләндәрҙе,
Әхирәттәр, апай-ағайҙар.
Сал ҡылғанлы тауҙар төшкә керә,
Емешле, еләкле туғайҙар.
Аҡ шишмәнең һыуын эсер өсөн,
Йүгерә инек тиҙерәк етергә.
Ап-аҡ ташлы Һуҡайлыла сумып,
Һыу ингәндәр һаман хәтерҙә.
Таллығында күм-күк бөрлөгәндәр,
Йыя инек уны силәкләп.
Урманында йәмшегән ашарға,
Бара инек ҡыҙҙар һирәкләп.
Кәкүктән ышанып һорай инек,
Күпме ғүмер юлы кисергә.
Юҡ, хәҙер мин һис һорамаҫ инем,
Күпме ҡалған тиеп, йәшәргә.
Танһыҡтарым ҡаныр ине берәй,
Ҡайтып күрһәм тыуған яғымды.
Йәшәгән йортомдоң урамында.
Хәтерләрмен бала сағымды.
Кире ҡайтып булмай балалыҡҡа,
Шул саҡтарҙы бигерәк һағындым.
Мәғрифә РАФИҠОВА.
Өмөтбай ауылы.
Читайте нас:
© 2020-2024 Сайт издания "Стәрлебаш шишмәләре"
Газета зарегистрирована (ПИ №ТУ 02-01461 от 05.10.2015 г.) в Управлении Федеральной службы по надзору в сфере связи, информационных технологий и массовых коммуникаций по Республике Башкортостан.
УЧРЕДИТЕЛИ: Агентство по печати и средствам массовой информации Республики Башкортостан, Государственное унитарное предприятие Республики Башкортостан Издательский дом «Республика Башкортостан».
Телефон
8 (34739) 22356
Электрон почта
Адресы
453830, Республика Башкортостан, c. Стерлибашево,ул. Карла Маркса, 102.
Реклама хеҙмәте
8 (34739) 22354
Редакция
8 (34739) 22353
Ҡабул итеү бүлмәһе
8 (34739) 22353
Хеҙмәттәшлек
8 (34739) 22378
Кадрҙар бүлеге
8 (34739) 22354