2022 йылдан ҡағыҙ паспорттар бөтөрөлә

Электрон паспорт – чиплы пластик карта. Бында фото, бармаҡ эҙе һәм шәхестең идентификация мәғлүмәттәре туплана. Электрон паспорт мотлаҡ пенсия страховкаһын, һалым түләүсенең идентификация һандарын һәм медицина полисын берләштерәсәк. Шулай уҡ ғәҙәти банк картаһын да уға бәйләп буласаҡ.

- Электрон паспорт әлегеһенә ҡарағанда ла хәүефһеҙерәк һәм күпкә уңайлы буласаҡ. Граждандар тураһында дөйөм мәғлүмәт берҙәм реестрҙа һаҡлана. Һәр ваҡыт уны тикшереп була, - ти IT компанияһы директоры Марат Рәхимҡолов һанлы форматтағы таныҡлыҡҡа ҡарата үҙ фекерен белдереп.

Паспорт-карточка 10 йылға биреләсәк. Ҡағыҙ документтарҙы электрон вариантҡа алыштырыу һәр кемдең теләге буйынса башҡарыласаҡ. Һанлы форматтағы паспортҡа күскәс, махсус терминалдар урынлаштырыу ҡарала. Электрон паспорт әле Эстония менән Ҡаҙағстанда ғәмәлгә ингән.