Бөтә яңылыҡтар
Йәмғиәт
14 Декабрь 2019, 17:45

Пенсионерҙы күтәреп алып сығалар

Дәүләкән ҡалаһының Сәғит Агиш урамында урынлашҡан шәхси йортта үткән төндә янғын сыға. Өйҙө ут ялмап алғанын күреп, патрулдә йөрөгән Росгвардия хеҙмәткәрҙәре тиҙ ярҙам хеҙмәтенә шылтырата һәм үҙҙәре лә йәһәт кенә ҡотҡарыу эшенә тотона.

Ҡапҡа бикле булғанлыҡтан, уларға кәртә аша һикереп төшөргә тура килә. Был ваҡытта өй эсендә өс оло кеше - бер ир, ике ҡатын - ут ҡамауында ҡалған була. Росгвардия хеҙмәткәрҙәре уларҙы ысын мәғәнәһендә үлем тырнағынан йолоп ала: янған йорттан тәҙрә аша сығырға ярҙам итәләр, ә 93 йәшлек пенсионерҙы күтәреп алып сығалар.
Сержант Павел Коломец һәм старшина Ильдар Фазылов өй янында торған автомобилде лә фажиғә урынына алыҫҡараҡ этеп ҡуя. Һуңынан инде ҡаза күреүселәрҙе ашығыс ярҙам табиптарына тапшыралар. Шулай итеп, ҡыйыу хеҙмәткәрҙәр ярҙамында кеше ғүмерҙәре һаҡлап ҡалына!
Әле янғын сығыу сәбәптәре тикшерелә.
Фото:Росгвардия РБ
Автор: Миләүшә Сайтакова
Читайте нас в