78 йәшлек инәй нисек яңы йортло булған?

“Район үҙәге буйлап йөрөгәндә күҙемә ҡыйшайып бөткән бер өй салынды, – тип һөйләй Архангел районы хакимиәте башлығы Илшат Әминев. – Ҡыҙыҡһыныу еңде, инеп, йорт хужабикәһе менән таныштым. Яңғыҙаҡ инәйгә Ветерандар йортонда урын тәҡдим иттек, унда барырға теләмәй. Ә күҙҙәрендәге осҡондар йәшәргә ынтылышы хаҡында һөйләй. Йорт төҙөп бирәбеҙ, тигәс, йөҙө яҡтырып китте. Шул саҡ Башҡортостан Башлығы Радий Хәбировтың башҡорт өмәләрен тергеҙәйек тигән һүҙҙәре иҫкә төштө...”

Илшат Нәжметдин улының башланғысы менән Нина Николаевнаға өмә итеп йәһәт кенә өй ҡалҡытҡандар. Хәҙер 80-де түңәрәкләгән әбей заманса йортта ғүмер йомғағын һүтә.