Иң мөһим шарт – балаларҙы эскерһеҙ яратыу

“Баҙлауыҡ” балалар баҡсаһы ярай­һы уҡ ҙур – 45 йыллыҡ тарихҡа эйә. Ул 1974 йылда “Башмедьстрой” тресы тарафынан төҙөлөп тапшырыла һәм оҙаҡ йылдар дауамында ошо төҙөлөш ойошмаһы ҡарамағындағы балалар баҡсаһы булараҡ эшләй. Ошо йылдар эсендә мәктәпкәсә белем биреү учреж­дениеһында 2500 тирәһе бала тәрбиә һәм белем алып, мәктәпкә юлланған.

Баҡсаға төрлө йылдарҙа тәжрибәле, үҙ заманы менән бергә атлаған мөдир­ҙәр етәкселек итә. Софья Рысмөхә­мәтова, Алла Осипова, Нәйлә Гәрәева кеүек алдынғы ҡарашлы етәкселәр мәктәпкәсә учреждениела бәләкәстәр өсөн уңайлы шарттар булдырыу, матди базаны нығытыу йәһәтенән ҙур эштәр башҡара. Бөгөн балалар баҡсаһы мөдире вазифаһын йәш, энергиялы, үҙенә лә, башҡаларға ла талапсан Альбина Әсмәндийәрова уңышлы үтәй.

Альбина Риф ҡыҙы берҙәм, татыу коллектив туплауға өлгәште. Беҙҙә эшләгән педагогтарҙың 85 проценты юғары һөнәри белемгә эйә. Рәсәй дөйөм мәғарифының почетлы хеҙмәт­кәре, Башҡортостандың атҡаҙанған мәғариф алдынғыһы булып танылған хеҙмәттәштәребеҙ ҙә байтаҡ.

Оҙаҡ йылдар тәрбиәсе һөнәренә тоғро ҡалып, бер урында – ошо балалар баҡсаһында эшләгән коллега­ларыбыҙ Шәүрә Шамил ҡыҙы Йосопова, Әлфиә Морат ҡыҙы Төхвәтуллина, Гөлсәсәк Рәйес ҡыҙы Шәрипова, Лариса Владимировна Огнева, Алһыу Ғимал ҡыҙы Баймырҙина, өлкән тәрбиә­се Александра Павловна Кузмина беҙгә һәр йәһәттән кәңәшсе һәм терәк.

2003 йылдан беҙҙең балалар баҡса­һында ике телле тәрбиә биреү буйынса тәжрибә майҙансығы эшләп килә. Башҡорт төркөмдәренең һанын дүртәү­гә тиклем арттырыуға өлгәштек. Бөтә төркөмдәрҙә лә тәрбиә процесын, дәү­ләт телдәре булараҡ, башҡорт һәм рус телдәрендә ойошторорға тыры­шабыҙ. Тәрбиәләнеүселәребеҙ ҡала кимәлендә үткән конкурс-фестивал­дәрҙә ҡатна­шып, алдынғы урындар яулап ҡыуан­дыра. Мәҫәлән, Лилиә Яҡшы­ғолова “Урал батыр” эпосын һөйләү буйынса йәш сәсәндәр бәйгеһендә гран-при яуланы. Вика Барлыбаева – Ю.А. Гагарин исемендәге кубокка мәктәпкәсә йәштә­геләр араһында үткәрелгән олимпиа­даның муниципаль этабында, Элина Мортазина йәш шиғыр һөйләүселәр конкурсында беренсе урынға лайыҡ булды. Ильяс Назаров шашка ярыштарында еңеүҙәр яулап килә.

Балалар ғына түгел, беҙ, тәрбиә­селәр ҙә, ҡала һәм республика кимәлендәге ярыш-фестивалдәрҙә әүҙем ҡатнашабыҙ. Бындай саралар оҫталыҡты арттырыуға, коллективта берҙәмлек тәрбиәләүгә булышлыҡ итә. Мәҫәлән, быйыл хеҙмәттәшебеҙ Лилиә Йортбәкова “Йылдың йәш педагогы” ҡала конкурсында беренсе урын яулап ҡыуанды. Башҡортостан Республикаһы ойошторолоуға 100 йыл тулыу уңа­йынан үткәрелгән Сибай ҡалаһының художество үҙешмәкәр коллективтары смотрында ла I дәрәжәле дипломға лайыҡ булдыҡ.

Баҡсабыҙҙың матди базаһы бик бай: интерактив таҡта, компьютерҙар, мультимедиа проекторы, заманса теле­визорҙар эшебеҙҙе ҡыҙыҡлыраҡ итеп ойоштороуға булышлыҡ итә. Психолог һәм логопед өсөн айырым бүлмәләр булдырылған. Шулай уҡ легоконструкторлау һәм робот техникаһы кабинеттарында ла балалар теләп шөғөлләнә.

“Баҙлауыҡ” балалар баҡсаһы коллективы алып барған тағы бер эшмә­кәрлек йүнәлеше тураһында айырып билдәләгем килә. Беҙ кескәйҙәргә экологик тәрбиә биреү буйынса маҡсатлы хеҙмәт итәбеҙ һәм уларҙы бәләкәстән тәбиғәткә яҡын булырға, сынығып үҫергә өйрәтәбеҙ. “Тәбиғәттәге дәрес­тәр” тип аталған был эшебеҙҙе дөйөм­ләштереп, төбәк кимәлендә фәнни-ғәмәли конференция уҙғарҙыҡ.

Был йәһәттән нимәләр эшләнә? Йы­лы миҙгелдәрҙә балаларҙың баҡса­лағы һәр көнө саф һауалағы күнек­мә­ләрҙән башлана. Ихатала коллектив­тың һәм ата-әсәләрҙең берҙәм көсө менән кәрәкле ҡорамалдар урынлаштырылды. Биләмәне йәшелләндереүгә – ағастар, һәр төрлө ҡыуаҡтар ултыр­тыу­ға, сәскәләр үҫтереүгә ҙур иғтибар бүленә. Бында ла ата-әсәләрҙең ярҙамын тоябыҙ.

Ошондай шарттар булғанда, алдыңа яңы маҡсаттар ҡуйғанда, бөгөн балалар баҡсаһында йөҙөп йөрөп эшләргә мөмкин. Әлбиттә, уңайлыҡтар, алдынғы технологиялар барыһы ла кәрәк, әммә тәрбиәсе булыу өсөн иң мөһим шарт һәр заманда берәүҙер: ул – балаларҙы эскерһеҙ яратыу.

Автор: Айгөл ИСХАҠОВА, “Баҙлауыҡ” балалар баҡсаһы тәрбиәсеһе. Сибай ҡалаһы

https://bash.rbsmi.ru/articles/belem-m-t-rbi/i-m-im-shart-balalar-y-esker-e-yaratyu-/