Һигеҙ һыйыр аҫрағансы, һимеҙ һыйыр аҫра

Хужалыҡтың Фәүҡинур Солтанова исемендәге Һамар һөт-тауар фермаһы бөгөн тулыһынса роботтар ҡулына күскән. Улар үҙҙәре үк һыйырҙарҙы һауа, малға бесән һа­ла, уны тарата һәм мал ҡураһын таҙарта. Республиканың өҫтөнлөк­лө инвестиция проекты сиктәрендә тормошҡа ашырылған заманса ферма киләсәктә һөт етештереү күләмен арттырыуға һәм уның сифатын яҡшыртыуға булышлыҡ итәсәк.

Әле хужалыҡтың Һамар бүлек­сә­һендә Голландиянан килтерел­гән роботтарҙы монтажлау эше бара. Роботлаштырылған һөт-тауар фермаһы етәксеһе Илдус Һабанбаев белдереүенсә, 400-гә яҡын малға иҫәпләнгән йылы һәм заманса ҡура 40х160 квадрат метр майҙанды тәшкил итә. Бөтә эштәр­ҙе лә унда роботтар башҡарасаҡ, белгестәр уларҙың эшен көйләп, күҙәтеп кенә бара.

Ошо көндәрҙә Әбйәлил еренә Даниянан “голштин” тоҡомло 265 баш тана имен-һау аяҡ баҫты. Мал­ҡайҙар юлда биш тәүлек килгән.

“Көнбайыш Европала уларҙы көнөнә бер тапҡыр машинанан тө­шө­рөп ял иттереп, ашатып алдыҡ. Тик Рәсәйҙә ундай махсус урындар булмағанлыҡтан, бер ерҙә генә ашатырға мөмкинлек булды, – ти водителдәр. – Уның ҡарауы, ма­ши­наларҙа малға етәрлек аҙыҡ, һыу запасы тупланған, бүлектәрҙә аша­тыу, һыу эсереү яйланмалары бар”.

Хужалыҡтың баш зоотехнигы Шәфҡәт Шәмсетдинов әйтеүенсә, әле сит ил “ҡунаҡтары” Озерный фермаһында, бер ай карантин билдәләнгән. Тейешле осорҙо үткәреп, прививкалар һалынғас та, малдарҙы роботлаштырылған фермаға күсереү ҡарала.

– “Голштин” тоҡомло һыйырҙар донъяла иң һөтлө булараҡ билдә­ле, улар тәүлегенә 30 литрға тиклем аҡ бирә. Уларҙың генетикаһы көслө. Әйткәндәй, беҙҙең белгес­тәр Данияға барып, малдарҙы үҙҙәре ҡарап, бар яҡлап тикшереп алып ҡайтты. Был таналарҙың елене махсус рәүештә роботтар һауыуға ҡулайлаштырылған. Бар таналар ҙа быуаҙ, тиҙҙән тәүге бы­ҙауҙар донъяға килер тигән өмөт­тәбеҙ. Әлегә сит илдән кил­терелгән малдарҙы ветеринарҙар етди контроль аша үткәрә, бар документтар ентекле тикшерелә, – ти Шәфҡәт Зәйнетдин улы.

Әйткәндәй, Даниянан ҡайтарыл­ған малды алты робот һауасаҡ. Проект нигеҙендә “Красная Башкирия” хужалығына йәнә 143 баш сит ил малҡайы киләсәк. “Инвест­сәғәт”тә әйтелгәнсә, хужалыҡҡа “голштин” тоҡомло мал һатып алыу өсөн субсидия биреләсәк. Тимәк, бер тананың яҡынса хаҡы 165 мең һумдан ашыу булған хәлдә, уның бер өлөшөн дәүләт ҡаплаясаҡ.

Ҡасандыр районда ғына түгел, тотош республикала “Ноу-тилл” технологияһын тәүгеләрҙән булып файҙалана башлаған “Красная Башкирия” хужалығы малсылыҡ өлкәһендә лә төбәктә беренсе булып роботлаштырылған ферманы сафҡа индереп, тиҙҙән Дания һыйырҙарынан мул һөт һауып алырға иҫәп тота.

Әбйәлил районы.

https://bash.rbsmi.ru/articles/i-tisad/ige-yyyr-a-ra-ansy-ime-yyyr-a-ra/