Шартлы янғын һүндерелде

Дауаханаларҙа янғындар һәр ваҡыт ҙур ауырлыҡ тыуҙыра һәм уларҙың үҙ үҙенсәлектәре бар. Тәү сиратта, үҙ аллы хәрәкәт итә алмаған пациенттарҙың һәм сирлеләрҙең булыуы эвакуацияны ярайһы уҡ ҡатмарлаштыра. Бынан тыш, фармацевтика препараттары янғанда токсик матдәләрҙең бүленеүе мөмкин. Кабинеттарҙа мебель, ҡағыҙ, кейем-һалым һ.б. яныу сәбәпле, уттың ҙур майҙандарҙы биләп алыуы мөмкин һәм уны һүндереү өсөн өҫтәмә көс һәм саралар йәлеп итергә тура килә. Шуға күрә, медицина персоналы ғәҙәттән тыш хәлдәргә әҙер булһын, паникаға бирелмәһен һәм тейешле оҫталыҡҡа эйә булһын өсөн, уҙған аҙнала үҙәк район дауаханаһы территорияһында шартлы янғынды һүндереүгә бәйле күнекмә үткәрелде.