Өфөлә Көньяҡ автовокзалды күсереүҙәре ихтимал

Ошо хаҡта 13 мартта «КоммерсантЪ-Башҡортостан» баҫмаһының матбуғат конференцияһында ҡала транспорт идаралығының ташыуҙы ойоштороу бүлеге етәксеһе Альберт Сәфәров хәбәр итте.

Уның һүҙҙәренсә, Санкт-Петербург транспорт системалары институты белгестәре Өфө өсөн яңы пассажирҙар ташыу моделен эшләгән. Унда өр-яңы транспорт инфраструктураһын үҫтереү варианттары, улар араһында Көньяҡ автовокзалды баш ҡаланың ситенә – Сик урамына күсереү ҙә бар. Ошо моделгә ярашлы, шулай уҡ ҡабатланған һәм законһыҙ маршруттарҙы бөтөрөү, Октябрь проспектын бушатыу, транспорттарҙың бер өлөшөн Блюхер, Зорге урамдарына күсереү күҙаллана.

Проектты тормошҡа ашырыу ваҡыты әлегә билдәһеҙ. "Башинформ".