Берҙәмлеккә – “бишле!”

– Кемдәр “әсәй” тип өндәшә, ә кемдәр “инәй” ти? – тигән һорау бирелде залға. Ысынлап та, донъялағы иң яҡын кешеңә төрлө яҡта төрлөсә өндәшәләр. Мәҫәлән, республикабыҙҙың көньяғында – “әсәй”, урта өлөшөндә – “инәй”, тағы бер нисә төбәктә “әнкәй” тиҙәр. Ошо бер генә миҫал башҡорт теленең ни хәтлем бай икәнен күрһәтә. Ҡыҫҡаһы, беҙ ниндәй генә диалектта һөйләшһәк тә, үҙебеҙҙе башҡорт тип һанайбыҙ.

Дәрестә Мостай Кәримдең “Беҙҙең өйҙөң йәме” әҫәре буйынса төшөрөлгән “Һеңлекәш” фильмынан өҙөк күрһәтелде, Мифтахетдин Аҡмулланың шәжәрәһе менән таныштырҙылар.

– Ялан сәскәләрен күҙ алдына килтерәһегеҙме? Болонлоҡта сәскәнең ниндәй генә төрө юҡ! Күҙҙең яуын алырлыҡ! Улар тирә-яҡҡа хуш еҫ тарата. Шуның шикелле, беҙҙең телебеҙ ҙә бик бай. Уның ҡәҙәрен беләйек, моңон тойоп, бүтәндәргә таратайыҡ, – тине Рәсәйҙең һәм Башҡортостандың халыҡ артисы, Салауат Юлаев исемендәге дәүләт премияһы лауреаты Хөрмәтулла Үтәшев.