Көҙ йәмдәре сағылды

Ауыл уңғандары алып килгән йәшелсә-емеш тиҙ һатылып бөттө. Республика көнөндә Өфөлә бер нисә урында ауыл хужалығы йәрминкәләре ойошторолоуы тураһында хәбәр иткәйнек инде. Ысынлап та, үткән шәмбе һәм йәкшәмбе көндәре баш ҡалабыҙҙың Дим биҫтәһендәге Хәҡиҡәт, Интернациональ һәм Машина төҙөүселәр урамдарында, Мушников урамы менән Баландин бульвары киҫелешкән урында, Йәшел сауҡалыҡ биҫтәһендә Эшсе хәбәрселәр урамындағы майҙансыҡта, Затонда “Тулҡын” скверы ҡаршыһында, Спорт һарайы янында көҙгө йәрминкәләр гөрләп торҙо. Иртәнге туғыҙ тулыр-тулмаҫтан уҡ Октябрҙең 50 йыллығы урамындағы Йәштәр һарайы алдына ла халыҡ ағыла башланы.

Ауыл уңғандары нимә генә килтермәгән! Бында бер килограмм картуфты 12 һумға, кишерҙе – 20, боросто – 50, помидорҙы 60 һумға һатып алырға мөмкин ине. Балдың төрлөһөн алып ҡыуанды халыҡ, ике меңгә һатылған өс литрлыҡ йүкә балын сират тороп алдылар. Ярты литр ҡымыҙ – 70, ә бер литр көнбағыш майы 120 һумға һатылды. Шулай уҡ өфөләргә һәм ҡунаҡтарға һуған, һарымһаҡ, ҡыяр, ҡабаҡ, сөгөлдөр һымаҡ йәшелсәләр тәҡдим ителде, алманы телгә алыу артыҡ. Иң мөһиме, аҙыҡ-түлекте арзан хаҡҡа һатып алып ҡалырға мөмкинлек ҙур булды. Ҡыҫҡаһы, хәстәрлеләр ҡышҡылыҡҡа мул аҙыҡ запасы тупланы.

Алыҫ тип тормай Күгәрсен тарафтарынан баш ҡалабыҙға Айнур Камалетдинов иртә менән килеп еткән ине. Айнур Мансур улының һүҙҙәренә ҡарағанда, Күгәрсен районы ерҙәре техник культуралар, айырыуса көнбағыш үҫтереү өсөн уңайлы һанала, йылдың нисек килеүенә ҡарамаҫтан, әгәр уны ваҡытында ултыртып, химик утауҙы дөрөҫ башҡарһаң, мул уңыш алырға мөмкин. Элегерәк көнбағышты күпмелер ваҡыт ҡыҙҙырып майын һыға торғайнылар, хәҙер майҙы һыуыҡ ысул менән алалар икән, улай иткәндә витаминдар яҡшы һаҡлана.

– Тиккә генә картуфты икенсе икмәккә тиңләмәйҙәр, уның өҫтәлдән өҙөлмәүенән, түрҙә булыуынан сығып шулай тигәндәр, – тип һөйләй Бөрө районында ғүмер иткән Шәрәфи Ғәләүетдинов. – Кемгә нисектер, беҙгә ҡалһа, картуф үҫтереү әллә ни мәшәҡәтле түгел, бары тик тырышлыҡ ҡына кәрәк. Был шөғөлгә тотоноуыбыҙға байтаҡ ваҡыт инде, киләсәктә баҡсабыҙҙы тағы ла иркенәйтергә уйлайбыҙ. Файҙаһы булмаһа, Өфө тиклем Өфөгә алып килмәҫ тә инек.

Ауырғазы районының Мораҙым ауылында йәшәүсе Зөлфәт Рамаҙановтың өҫтәлендә иһә йүкә, ҡарабойҙай, сәскә балдары күп ине, үҙ сиратында, халыҡ та был урынға өйкөлөшкән.

– 2018 йыл менән сағыштырғанда быйыл балды көткәнгә ҡарағанда ла күберәк алдыҡ, – тип һөйөнөсө менән уртаҡлаша умартасы Зөлфәт Йәүҙәт улы. – Умарталарҙы шылдырып йөрөү үҙен тулыһынса аҡлай, Ғафури районының Ҡурғашлы, Ишембай районының Маҡар ауылдары эргәһендә булдыҡ. Былай йәрминкә ҡыҙыу дауам итһә, бер сәғәттән тауарымды һатып бөтәсәкмен. Һыуһыҙ ерҙә – балыҡ, иҫәпһеҙ ерҙә байлыҡ тормаҫ, тигәндәй, һәр нәмәне һанап тороу зарур. Тапҡаныңды әрәм-шәрәм итергә ярамай.

Ул көндө ямғыр һибәләп торһа ла, йәрминкә ойошторолған майҙансыҡтар халыҡтың күплегенән умарта күсе шикелле гөжләп торҙо. Бигерәк тә өлкән йәштәгеләр байтаҡ ине. Йәрминкәне ойоштороусылар тарафынан әҙерләнгән йыр-моңдо тыңлап кинәнде һәр кем. Егәрлеләр алып килгән йәшелсә-емеш йәрминкәләрҙә тиҙ һатылып бөттө. Башҡортостан гәзитенән.

Читайте нас:

Газета зарегистрирована (ПИ №ТУ 02-01461 от 05.10.2015 г.) в Управлении Федеральной службы по надзору в сфере связи, информационных технологий и массовых коммуникаций по Республике Башкортостан.

УЧРЕДИТЕЛИ: Агентство по печати и средствам массовой информации Республики Башкортостан, Государственное унитарное предприятие Республики Башкортостан Издательский дом «Республика Башкортостан».

Телефон

8 (34739) 22356

Электрон почта

[email protected]

Адресы

453830, Республика Башкортостан, c. Стерлибашево,ул. Карла Маркса, 102.

Реклама хеҙмәте

8 (34739) 22354

Редакция

8 (34739) 22353

Ҡабул итеү бүлмәһе

8 (34739) 22353

Хеҙмәттәшлек

8 (34739) 22378

Кадрҙар бүлеге

8 (34739) 22354