Башҡортостанға хеҙмәт итәбеҙ!

Дөрөҫөн әйткәндә, журналист Азат Ғиззәтуллиндың был бүләге күптән барҙыр тип уйлай инем. Беҙ әле студент саҡ­та уҡ ул радио һәм теле­виде­ние­лағы тапшырыуҙары, йылы тауышы, шулай уҡ мәшһүр яҙыу­сының ейәне булыуы ме­нән дә билдәле ине. Уны “Баш­информ” мәғлүмәт агент­лы­ғын­дағы хеҙмәте, көндәлек яңылыҡтары, уларҙы заманса биреүе өсөн бүләкләнеләр. “Журналист эше, бер ҡараһаң, күренмәй ҙә төҫлө, сөнки ул көндәлек мәғлүмәт, фекер ет­керә, әммә әгәр улар профессиональ кимәлдә булмаһа, шунда уҡ реакция һиҙелә. Бөгөн беҙҙе бүләкләйҙәр икән, тимәк, хеҙмәтебеҙҙе баһа­лайҙар!” – тине Азат Ғиззәтуллин.

Бүләкләнеүселәр араһында Башҡортостан юлдаш теле­видениеһы журналисы Рафиҡ Әхмәтшин да бар. Ул мәртәбәле наградаға үҙенең замана проблемаларын өйрәнеп эшләгән репортаждары өсөн лайыҡ булды. Коллегабыҙҙы журналистика хаҡында ҡыйыу, заманса фекерле әңгәмәсе тип тә беләбеҙ. Уның киң ҡоласлы ҡарашы ижадын дәүләтселек институтына бәйләһен! “Бөгөн журна­листың ғына түгел, ә барыбыҙҙың да мәғлүмәт бармаҡ осонда, шуға күрә журналистың халыҡҡа дөрөҫ мәғлүмәт еткереүе мөһим!” – тине Рафиҡ Үзбәк улы.

“Кызыл таң” гәзитенең сәйәсәт бүлеге мөдире Фәнүз Хәбибуллин да Шәһит Хоҙайбирҙин исемендәге премияға лайыҡ булды. Уны халыҡ сәйәси темаларҙы ғына түгел, ә иман мәсьәләләрен күтәргән журналист тип белә. Фәнүз Хәби­буллин шулай уҡ фронтовик яҙыусы Бәҙрүш Моҡамай тураһында китап та яҙған. Ошо көндәрҙә баҫма “Мир печати” нәшриәтендә донъя күрәсәк. Билдәле булыуынса, Бәҙрүш Моҡамай – Башҡортостан яҙыусыһы, сығышы менән Дүртөйлө районынан.

Рәхмәт! Быйыл был бүләкте миңә лә бирҙеләр. Башҡортостан Автоно­мияһының 100 йыллығында, Республика көнөндә, шул дәүләтселек башында торған “Башҡортостан” гәзите хеҙмәткәрен бүләкләү символик мәғәнәгә эйә!

Быға тиклем әйткән һүҙҙәремде тағы бер тапҡыр ҡабатлайым: “Лариса Абдуллина” – ул псевдоним ғына бит ул. Ошо исемгә балаларымды ҡараш­ҡан әсәйем дә, ирем дә, ҡәйнәм дә, әсәһе менән командировкаларға йөрөгән, киске сараларҙан ҡалмаған улдарым да, ғүмеремә етерлек һабаҡ биргән, доғалары менән мине Күктән ҡурсалап торған нәнәйемдәр, сәфәр­ҙәрҙә арҡам­дан һөйөп, яратып ҡалған ағинәй­ҙәр, кәңәштәре менән ярҙам ит­кән ағайҙарым, яңы һанға тип ашы­ғып яҙып биргән мәҡәләләремде тө­ҙә­тешкән коллегаларым да хеҙмәт итә”.Башҡортостан гәзитенән.