Бөтә яңылыҡтар
Төрлөһөнән
12 Сентябрь 2019, 11:02

"Минең балам түгел"

Бөйөк Ватан һуғышынан һуң Әлшәй районында була был хәл.

Ауылда атаһы ла, ағаһы ла һуғышта ҡалған етем ҡыҙ Зилә йәшәй. Уның янына Камил исемле егет килеп йөрөй. Теле телгә йоҡмаҫ егет уға: "Һинһеҙ бер көн дә йәшәй алмайым, өйләнешәбеҙ", – тип тәтелдәй. Бисара ҡыҙ уны бик тә оҡшата.


Бер аҙҙан Зиләнең ауырға ҡалыуы билдәле була. Быны белеп ҡалған Камил унан ситләшә. Ваҡыты еткәс, сабый донъяға килә.


Таныш-тоношо йәш әсәне алимент юлларға өндәй. Был хәбәрҙе ишеткәс, Камил ҡурҡыуға ҡала. Ул дуҫтары Таһир, Талип, Сафаны саҡырып һыйлай ҙа:


– Егеттәр, бәләнән ҡотҡарығыҙ: судта бөтәгеҙ ҙә, Зилә менән беҙ ҙә булдыҡ, тип әйтегеҙ, – ти.


Ауылда суд бара. Клуб эсе тулы халыҡ. Меҫкен ҡыҙ оятынан башын аҫҡа эйеп кенә баланың атаһы Камил икәнен әйтә. Тегеһе иһә күҙен дә йоммайынса: “Бала минеке түгел. Зилә эргәһенә ауылдан күп егеттәр килеп йөрөнө”, – ти.


Әшнәләре уның һүҙҙәрен йөпләй. Зилә иһә илай-илай: “Дөрөҫ түгел, алдайҙар”, – тип кенә әйтә ала.


Судья аптырап ҡалмай. Һуғыштан һуңғы ваҡыт бит, шундай хоҡуҡ та булғандыр: егеттәрҙең дүртеһенән дә Зиләнең ҡыҙы 18 йәшкә еткәнсе алимент түләтеү хаҡында ҡарар уҡып ишеттерелә... Башҡортостан гәзитенән.
Читайте нас в