+7 °С
Болотло
Бөтә яңылыҡтар
Төрлөһөнән
30 Август 2019, 12:19
«04» хеҙмәте һәр ваҡыт әҙерлек һыҙығында
Нефть кеше тарафынан алты мең йылдан ашыу файҙаланыла ла инде. Был файҙалы ҡаҙылма тураһында Вавилонда белгәндәр һәм уны биналар төҙөгәндә, диңгеҙ судноларын һыу үтмәҫлек итеп көпләгәндә ҡулланғандар. Боронғо Мысыр халҡы биналарҙы яҡтыртыу өсөн лампалар ҡулланған, уларға яғыулыҡ булып нефть хеҙмәт иткән. Византия империяһы ваҡытында «Греция уты» иң ҡурҡыныс ҡорал булған. Уны һыу менән һүндереп булмаған, сөнки был тағы ла яныуҙы көсәйткән... Былар бер аҙ тарихҡа байҡау булды.Ағымдағы йылда нефть һәм газ сәнәғәте хеҙмәткәрҙәре байрамы 1 сентябргә тура килә һәм Рәсәйҙә 39-сы тапҡыр билдәләнә. Уның асылы - өйҙәребеҙҙә йылылыҡ һәм уңайлылыҡ булдырғандарҙың барыһына ла рәхмәт белдереү, ил иҡтисадында газ һәм нефть тармағының мөһимлеген күрһәтеү. Урындағы газ хеҙмәткәрҙәре һөнәри байрамдарын ниндәй күрһәткестәр менән ҡаршылай? Салауат ҡалаһы «Газпром газ бүлеү Өфө» филиалы Стәрлебаш комплекслы газ хеҙмәте етәксеһе Ю.Х.Рысаев менән әңгәмәбеҙ ошо хаҡта.
- «Зәңгәр яғыулыҡ»һыҙ бөгөнгө тормошто күҙ алдына ла килтереү мөмкин түгел. Йылдан-йыл яңы йорттар төҙөү иҫәбенә Һеҙҙең коллектив хеҙмәтләндергән объекттар иҫәбе арта. Юнир Ханмырҙа улы, уҙған осорҙа газ хеҙмәткәрҙәре тарафынан ниндәй эштәр башҡарылған?
- Беҙҙең эштең үҙенсәлеге шундай, беҙ тотош йыл дауамында ниндәй ҙә һауа торошонда тырышып эшләйбеҙ. Әммә, йәй һәм көҙ - беҙҙең өсөн үҙенсәлекле ваҡыт, сөнки ҡышҡы миҙгел һәйбәт режимда, ғәҙәттән тыш хәлдәрһеҙ үтһен өсөн газ ҡоролмаларын әҙерләйбеҙ. Бының өсөн 324 берәмек келәле арматураны техник хеҙмәтләндерҙек; 76 газ көйләү (ГРП), газ блоклы көйләү (ПГБ), шкафлы көйләү (ШРП) пункттарында газ ҡоролмаларын ремонтланыҡ һәм техник хеҙмәтләндерҙек; 68,8 километр ер аҫты газ үткәргесен техник хеҙмәтләндерҙек; өс газ ҡоҙоғон бөтөрҙөк. Газ үткәргес һалдыҡ һәм Стәрлебаш ауылының Әхмәтов һәм Ленин урамдары буйынса 1 һәм 2 һанлы блоклы модуль ҡаҙанлыҡтарына уртаса баҫымлы газ үткәргесте тоташтырҙыҡ. Гөмбаҙы, Бүләк, Түбәнге Шәкәр, Баҡый, Буҙат ауылдарында биш ГРП, ПГБ алмаштырҙыҡ. Торлаҡ йорттарға газ үткәреү буйынса ҙур эш башҡарыла. Бөгөнгө көндә ул 26 йортта башҡарылған.
- Ағымдағы йылда тағы алты күп фатирлы ике ҡатлы йорт шәхси газ йылытыуына күсә.
- Эйе. Һәм газ ҡорамалдары өҙлөкһөҙ, аварияһыҙ эшләһен өсөн уларҙы тикшереү буйынса барлыҡ эштәр беҙҙең хеҙмәткәрҙәрҙең яуаплылығы зонаһында.
- Белеүемсә, был йәһәттән уларға ялыуҙар юҡ?
- Эйе. Сөнки эштәрен улар намыҫлы башҡара. Быға йорттарҙа йылылыҡ һәм газ менән тәьмин итеү генә түгел, кешеләрҙең ғүмере лә бәйле. Был турала шул факт та һөйләй, ошо көндәрҙә район етәкселеге үткәргән традицион граждандарҙы ҡабул итеүҙәрҙә, беҙҙең хеҙмәткә ҡарата ялыуҙар булманы.
- Һуңғы ваҡытта Һеҙ етәкләгән коллектив күпкә йәшәрҙе.
- Барлығы унда 57 кеше иҫәпләнә. Улар хеҙмәт бурыстарын яҡшы белә, яуаплы һәм итәғәтлеләр. Эштәрен яраталар һәм ҡәҙерен беләләр. Беҙҙән китһәләр ҙә, хаҡлы ялға ғына. Эйе, һуңғы ваҡытта коллектив йәш кадрҙар менән тулыланды. Һәм был һөйөндөрә. Шуға ҡарамаҫтан, йәштәр һынатмай. Улар белгәндәренән тыш, өлкәндәрҙән оҫталыҡ серҙәренә өйрәнә, даими рәүештә квалификацияларын арттыра.
- Алдынғыларһыҙ ниндәй байрам булһын? Һеҙҙә лә улар аҙ түгелдер тип уйлайым.
- Күндерәк зонаһының ете ауылын хеҙмәтләндергән Фәуәт Һөйәрембәтовты айырыуса билдәләп үткем килә. Ул тиклем эш күләме башҡа берәүҙә лә юҡ. Шуға күрә уға ғәйәт ҙур эш йөкмәтелгән. Яуаплы, башҡарыусан Фәуәт бөтә эште еренә еткереп башҡара. Шулай уҡ Ринат Ғиззетдинов (Буҙат зонаһы), Әлфир Дәүләтшин (Ҡуғанаҡбаш зонаһы), Әлмир Саҙриев (Ямғырсы зонаһы), ауылдарҙа һәм район үҙәгендә өйҙәрҙә газ ҡорамалдарын техник хеҙмәтләндереү менән шөғөлләнгән Айрат Мусаҡаев, Рәил Вәлишин, Ирина Латипова һәм Радмир Макашев составындағы бригада (бөгөнгө көндә улар 4600 йортта техник хеҙмәтләндереү үткәргән), Фәнил Ишбулдин, Руслан Ҡасимов, Дамир Ғәлиәкбәров, Рафаэль Мөхәмәтов, Сергей Мәхмүтов, Усман Байморатов, Ленар Йәминов, Ирек Ғәзизуллин, Иван Макаров, Илдар Ғәлиәкбәров, Ирек Кәримов, Радмир Бакиров, Ғәлиә Ғафаровалар ҙа шулай уҡ тик маҡтау һүҙҙәренә лайыҡ.
Һөнәри байрамыбыҙ алдынан хөрмәтле ветерандарыбыҙҙы һәм коллегаларыбыҙҙы ошо әһәмиәтле дата менән ихлас күңелдән ҡотлайым. Барығыҙға ла ныҡлы сәләмәтлек, район халҡы мәнфәғәтендә аварияларһыҙ эшләүегеҙҙе, ғаилә бәхете һәм яҡшы кәйеф теләйем.
- Әңгәмәгеҙ өсөн рәхмәт, Юнир Ханмырҙа улы!Рәйсә МУСИНА яҙып алды.
А.ЗӘЙНЕТДИНОВ фотоһы.
Читайте нас:
© 2020-2024 Сайт издания "Стәрлебаш шишмәләре"
Газета зарегистрирована (ПИ №ТУ 02-01461 от 05.10.2015 г.) в Управлении Федеральной службы по надзору в сфере связи, информационных технологий и массовых коммуникаций по Республике Башкортостан.
УЧРЕДИТЕЛИ: Агентство по печати и средствам массовой информации Республики Башкортостан, Государственное унитарное предприятие Республики Башкортостан Издательский дом «Республика Башкортостан».
Телефон
8 (34739) 22356
Электрон почта
Адресы
453830, Республика Башкортостан, c. Стерлибашево,ул. Карла Маркса, 102.
Реклама хеҙмәте
8 (34739) 22354
Редакция
8 (34739) 22353
Ҡабул итеү бүлмәһе
8 (34739) 22353
Хеҙмәттәшлек
8 (34739) 22378
Кадрҙар бүлеге
8 (34739) 22354