+7 °С
Болотло
Бөтә яңылыҡтар
Төрлөһөнән
30 Июль 2019, 13:11
Никахҡа ҡағылышлы башҡорт халыҡ мәҡәлдәре.
Үҙегеҙгә алып ҡуйығыҙ, һәм кәләш алмаған ир-егеттәргә, һәм кейәүгә сыҡмаған ҡатын-ҡыҙҙарға, берәмләп әйтеп йөрөрһөгөҙ! Бәлки ярҙамы тейер!
• Өйләнмәгәндең тамыры ҡорор.
• Яҡшы ат бығауһыҙ йөрөмәҫ, алама атҡа тышау ҙа теймәҫ.
• Арғымаҡтың билгеһе – ҡаҙы йыймаҫ, ял йыйыр,
яман егет билгеһе – ҡатын алмаҫ, мал йыйыр.
• Өйләнмәгәндең өйө булмаҫ, өйө булһа ла, иле булмаҫ.
• Өйләнеү – көйләнеү.
• Дәртһеҙ кеше – күҫәк, йәрһеҙ кеше – ишәк.
• Донъя күрке – йәр менән.
• Өйләнмәгәндән аҡыл һорамайҙар.
• Ҡыҙ егеткә ҡушыла – ебәк булып ишелә.
• Еткән ҡыҙ кейәүҙән ҡурҡмаҫ.
• Сәскәне ваҡытында өҙөү фарыз.
• Ҡарт булһа ла ирең булһын, алама булһа ла өйөң булһын.
• Алыҫтан ат алма, яҡындан ҡыҙ алма.
• Алыҫтан ҡыҙ алһаң, ҡосаҡ-ҡосаҡ бүләк килер,
яҡындан ҡыҙ алһаң, ҡосаҡ-ҡосаҡ ғәйбәт килер.
• Ишәк туйы – иллелә.
• Менгән атың – аҡбуҙ, һөйгән йәрең – йәш ҡыҙ.
• Йәш ҡайынға терәлеп ҡарт ҡайын ҡырҡ йыл йәшәгән.
• Ҡыҙың булһа, ирҙә булһын, ирҙә булмаһа, гүрҙә булһын.
• Ҡарт ҡыҙ ир һайламаҫ, үлгән кеше ер һайламаҫ.
• Иртә өйләнгән – улынан-ҡыҙынан кинәнгән.
• Атын алма, затын ал.
• Ат алһаң – ауылың менән, ҡыҙ алһаң ырыуың менән
кәңәшләш.
• Ярап торорға өй һалма, ярап торорға бисә алма.
• Дегәнәк араһында үҫкән сәскәнән һаҡлан.
• Күҙең менән һайлама, ҡолағың менән һайла.
• Ҡыҙҙың кемлеге кемәйенән (әхирәтенән) билгеле.
• Тибешеп ятһа ла тиңең булһын.
• Юрғаһына күрә дуғаһы.
• Буйың етмәгәнгә үрелмә.
• Ҡыҙыңды үҙеңдән түбәнерәккә бир, киленде үҙеңдән
юғарыраҡтан ал.
• Бай менән ҡоҙа булһаң, наҙланып маҙаңды алыр,
ярлы менән ҡоҙа булһаң, теләнеп маҙаңды алыр.
• Ҡалаҡ тотһа, хан ҡыҙының ҡулы ҡабара.
• Ҡамышты үҙ күлеңдән ал, кәләште үҙ илеңдән (йәғни, үҙ
динеңдән, милләтеңдән) ал.
• Көсләп асҡан күҙҙең нуры юҡ.
• Һөйгән йәр – һөйәгең елеге.
• Һөймәгәнгә һөйкәлмә.
• Мөхәббәт таш ярҙырта.
• Ике күңел бер булһа, сүплек башы гөл булыр.
• Ғишыҡ тотҡан – күҙһеҙ.
• Мөхәббәт тешкә ҡарамай, эшкә ҡарай.
• Алма үҙең һөйгәнде – алданырһың, ал үҙеңде һөйгәнде –
ҡыуанырһың.
• Ныҡ һөйә тип һөйөнмә, уртаса һөйә тип көйөнмә.
• Оялсан егет йәрһеҙ ҡалыр.
• Асҡыс ярамаҫ йоҙаҡ юҡ.
• Ҡыҙ оҙатҡан яланғас ҡалыр, килен алған түренә урын
һалыр.
• Бирмәҫ ҡыҙҙың ҡалымы ҙур.
• Ҡыҙыңа тиң кейәү килһә, ҡалым алма, тиген (бушлай) бир.
• Ат алһаң арба кәрәк, ҡатын алһаң бары ла кәрәк.
• Эшкә ашмаған ир – башыңа сир.
• Ябағаны яуға менмә, ялы бар тип, яман менән ҡоҙа булма,
малы бар тип.
• Бер бар – берәгәйле бар.
• Туғандарҙың татыулығы бар байлыҡтан артыҡ.
Читайте нас:
© 2020-2024 Сайт издания "Стәрлебаш шишмәләре"
Газета зарегистрирована (ПИ №ТУ 02-01461 от 05.10.2015 г.) в Управлении Федеральной службы по надзору в сфере связи, информационных технологий и массовых коммуникаций по Республике Башкортостан.
УЧРЕДИТЕЛИ: Агентство по печати и средствам массовой информации Республики Башкортостан, Государственное унитарное предприятие Республики Башкортостан Издательский дом «Республика Башкортостан».
Телефон
8 (34739) 22356
Электрон почта
Адресы
453830, Республика Башкортостан, c. Стерлибашево,ул. Карла Маркса, 102.
Реклама хеҙмәте
8 (34739) 22354
Редакция
8 (34739) 22353
Ҡабул итеү бүлмәһе
8 (34739) 22353
Хеҙмәттәшлек
8 (34739) 22378
Кадрҙар бүлеге
8 (34739) 22354