Балалар утта һәләк була

Иртән Иглин районы Октябрь ауыл биләмәһендә торлаҡ йортта янғын сығыуы тураһында хәбәр була. Янғын һүндереүселәр килеп етеүгә йортто ут ялмап ала һәм ҡыйығы емерелгән була. Янғынды һүндереүгә ете берәмек техника һәм шәхси составтан 13 кеше йәлеп ителә. Янғын һүнереү барышында 38 йәшлек ҡатындың, 2013 һәм 2017 йылғы ике ҡыҙҙың үле кәүҙәләре табыла.

Шул уҡ көндөң кисендә Рәсәй Ғәҙәттән тыш хәлдәр министрлығының БР буйынса баш идаралығы үҙәгенә Учалы районының Беренсе Май ауылында янғын сығыуы тураһында хәбәр була. Унда кисекмәҫтән ике берәмек техника һәм ете янғын һүндереү машинаһы, шулай уҡ Мансур ауыл билмәһе янғын һүндереү комплексы, полиция, медицина хеҙмәткәрҙәре һәм электр селтәрҙәре хеҙмәткәрҙәре ебәрелә. Беренсе подразделение килгән мәлдә өйҙө тулыһынса ут ялмап алған була. Емерелеү урынын таҙартҡан ваҡытта 2017 йылғы баланың кәүҙәһе табыла.

Ике осраҡта ла янғын сәбәптәре асыҡлана.

Хөрмәтле ата-әсәләр! Бер ваҡытта ла балаларығыҙҙы бикле өйҙә, фатирҙа йәки бүлмәлә хатта «биш минутҡа ла» ҡалдырмағыҙ! Шырпы, ҡабыҙғыс, еңел тоҡанып китеүсән һәм яныусан шыйыҡса, шулай уҡ дарыу һәм көнкүреш химияһын балаларығыҙҙың буйы етмәгән урындарҙа һаҡлағыҙ. Уларға газ һәм электр приборҙарын үҙ аллы ҡулланырға, мейес яғырға рөхсәт итмәгеҙ.

Балаларығыҙ менән мотлаҡ һөйләшеп, янғын сыҡҡан осраҡта нимә эшләргә кәрәклеген, шундай осраҡта шкафтарҙа, карауат аҫтында йәшенергә ярамағанлығын аңлатығыҙ, сөнки был уларҙы эҙләгәндә һәм ҡотҡарғанда ауырлыҡ тыуҙырасаҡ.

Онотмағыҙ! Балаларҙың хәүефһеҙлеге, тәү сиратта, ата-әсәләргә бәйле. Һәр бала үҙенең йәшәгән адресын белергә тейеш! Балаларығыҙ менән ашығыс хеҙмәттәрҙе саҡырыу телефондарын ятлағыҙ. Шырпы, еңел яныусан материалдар менән уйнау фажиғәле эҙемтәләргә килтереүен даими ҡабатлағыҙ. Хәүефһеҙлек сараларын үтәгәндә генә уларға юл ҡуймаҫҡа мөмкин.