«Минең бурыс - кешеләрҙе берләштереү, уларҙың яҡшы яҡтарын күрһәтеү», - ти Ләйсәнә Саҙретдинова

Әммә уҙған йылда беҙҙең район тураһында уның тапшырыуҙар циклынан һәм уға М.Аҡмулла исемендәге район премияһын тапшырғандан һуң Ләйсәнә Илгиз ҡыҙын районда белеп кенә ҡалмайҙар, яраталар һәм хөрмәт итәләр.

Ошо ғәжәйеп ҡатын менән хатта ҡыҫҡа осрашыу ҙа эҙһеҙ үтмәй. Ул йәшен тиҙлегендә ниндәй ҙә кеше менән бәйләнеш урынлаштыра белә. Йәше, енесе, йәмғиәттә ниндәй урын биләүе әһәмиәткә эйә түгел. Сөнки ул - үҙ эшенең оҫтаһы. Һәм тағы ла изгелекле, иғтибарлы, миһырбанлы, нескә һәм асыҡ күңелле ханым.

... Беҙ барыбыҙ ҙа бала саҡ иленән. Ләйсәнә, нигеҙҙә, Татарстан Республикаһының Аҙнаҡай районында өләсәһендә тәрбиәләнеп үҫә. Аҡыллы ҡатын яратҡан ейәнсәрен тормош серҙәренә өйрәтә. «Ризығың ҡайҙа булһа - шунда бараһың» - ти уға. Уның һүҙҙәре дөрөҫкә сыға. Медицина һөнәре тураһында хыялланған ҡыҙ, ваҡыт үтеү менән, музыка училищеһын тамамлап, уҡытыусы булып эш башлай, тормошҡа сыға, ул тәрбиәләй. Әммә яҙмышты алдап булмай, ул күпкә аҡыллыраҡ. Яҙмыш ҡушыуы буйынса Ләйсәнә телевидениеға килә һәм бында «Татарҙар» тапшырыуы өсөн татарҙар тураһында сюжеттар әҙерләй. Әммә өс минутлыҡ сюжетта тирә-яҡтағы ваҡиғаларға битараф булмаған ошо ҡатынды борсоған мәсьәләләрҙе тулыһынса күрһәтеп бөтөп буламы? Көнүҙәк, ҡыҙыҡлы, тәрән уйланыуҙарға һалыусы уның сюжеттары бер-береһенән бик ныҡ айырыла. Һәм Татарҙар конгресы етәкселеге уға үҙ проектын булдырырға тәҡдим итә. «Халҡым минең...» программаһы шулай барлыҡҡа килә. Ул нимә һәм кем тураһында? Ләйсәнә Илгиз ҡыҙының һүҙҙәре буйынса, тотош донъя буйынса таралған татарҙарҙы берләштереү, илдең төрлө төбәктәрендә уларҙың тормошон һүрәтләү.

- Мин - күпер, - ти ул үҙе тураһында. - Кешеләр араһындағы күпер. Мин уларҙы берләштерәм. Бик күп күрәм. Ҡәнәғәт булғандарҙы ғына түгел, интегеп йәшәгәндәрен дә. Минең тапшырыуым ярҙамында күп ғаиләләр тергеҙелеүенә, туғандарҙың бер-береһен табыуына шатмын. Ҡайһы саҡ тән сымырлап киткән осраҡтар була. Барлыҡ төшөргәндәрҙе күрһәтеп булмауы бик йәл, күп нимә кадр артында ҡала. Тәү сиратта, мин кешеләрҙең яҡшы яҡтарын, һәйбәт сифаттарын, матурлығын күрһәтергә тырышам.

Беҙҙең районға килгәс, ул тарихыбыҙҙың байлығына, халҡына, тәбиғәтенә ғашиҡ була. Ошо ерҙең күпме билдәле шәхестәр үҫтереүен, уларҙы тормош юлына баҫтырыуын белеп ғәжәпләнде ул. Шулар иҫәбендә Мифтахетдин Аҡмулла ла бар, стәрлебаштар уға тапшырған премия уның исемен йөрөтә. Ул сәхнәгә киске күлдәктә түгел, ә көндәлек тормошта кейгән костюм салбарҙа һәм ярты донъяны урап сыҡҡан аҡ биҙәкле ситектә күтәрелде. Үҙенә иғтибар ҙур булыуға тулҡынланыуы күренеп тора ине.

- Мин сәхнәлә тороп өйрәнмәгәнмен, - тине ул. - Унда торғандар тураһында һөйләргә өйрәнгәнмен. Шуға күрә тейешле кейенмәгәнмендер һәм үҙемде бик дөрөҫ тә тотмайымдыр, бәлки. Мине ғәфү итегеҙ. Миңә бер ҡайҙа ла шул тиклем иғтибар биргәндәре юҡ. Рәхмәт һеҙгә. Ҡулына сәскә гөлләмәһе тотоп ул сәхнәлә баҫып торҙо һәм кисә авторы һәм алып барыусы Зөлфиә Ғиззетдинованың уға бағышлаған ихлас, тулҡынландырғыс, күңелгә үтеп инерлек шиғырын тыңланы һәм бите буйлап йәш тамсылары тамды. Көслө ихтыярлы, тәүлегенә егермешәр сәғәт эшләй һәм шул уҡ ваҡытта шундай нескә күңелле. Был көндө ул стәрлебаштар алдында шундай төрлө булды.

Уны наградаһы менән ҡотларға бик күп кеше килде. Премияны булдырыусы Йәғәфәр Хисмәтуллин, район хакимиәте башлығының социаль мәсьәләләр буйынса урынбаҫары Альбина Суфьянова, яҡташыбыҙ, профессор, тарих фәндәре докторы, билдәле йырҙар авторы Рәфис Зыязетдинов, республика журналистары Айгөл Юлъяҡшина («Кызыл таң») һәм Дилбәр Булатова («Толпар»), район гәзите мөхәррире Мансаф Ғәниев, яҙыусы Зәки Зәйнуллин, Ләйсәнә Илгиз ҡыҙының яҡын дуҫтары, Татарстандан килгән ҡунаҡтар Мирғазиян Динмөхәмәтов һәм Зөлфиә Әхмәҙиева, Стәрлебаштан ҡәләмдәштәре Хисаметдин Исмәғилев, Рәфҡәт Рысаев, Илсур Рысаев, «Аҡ ҡалфаҡ» район йәмәғәт ойошмаһы етәксеһе, район буйынса Ләйсәнә Саҙретдинованы оҙатып йөрөүсе Люциә Дәүләтйәрова. Улар тантана геройына ҡарата ихлас һәм йылы ҡотлау һүҙҙәрен һәм теләктәрен йәлләмәне, ә тапшырылған сәскә гөлләмәләре уның ҡосағына һыйманы! Айгөл һәм Дилбәр талантлы кешеләргә ярҙамдары өсөн рәхмәт белдереп, Йәғәфәр Хисмәтуллин, Фәнүр Туҡтаров, Хисаметдин Исмәғилев, Зөлфиә Ғиззетдиноваға иҫтәлекле бүләктәр тапшырҙы.

Кисәне тантана геройының бала сағынан сәхнә өҙөгө биҙәне, уны Стәрлебаш татар халыҡ театры актерҙары (һүрәттә) оҫта уйнаны. Гөлфизә Хәйруллина, Рөстәм Ғәлиев, Зөлхизә Әсәҙуллина, Динислам Ғәйнетдинов, «Моң шишмә» баянсылар ансамбле, Ирәндек Дәүләтйәров, «Умырҙая», «Стәрлебаш бөркөттәре» вокаль ансамблдәре, «Әхирәттәр», «Ялҡынлы йөрәк» бейеү ансамблдәренең сығыштары кисәгә йәм өҫтәне. Зөлфиә Ғиззетдинова, Ленария һәм Вилсур Мөхәмәтйәновтар кисәне оҫта алып барҙы.

- Стәрлебаштарға күңел йылыһы өсөн ҙур рәхмәт. Һеҙҙең район буйынса командировка мәлендә бик күп сәғәттәр һыуыҡ негатив һәм фотоаппарат тотоп йөрөгән минең дуҫтарым устарымды ғына түгел, күңелемде лә йылытты. Улар минең менән баштан алып аҙаҡҡа тиклем булды, был бөтәһенең дә ҡулынан килмәй, сөнки минең эш графигым тығыҙ һәм көсөргәнешле. Һеҙҙең районығыҙ һоҡланғыс, бында матур ғаиләләр, талантлы кешеләр бихисап. Һәм мин һеҙгә тағы киләсәкмен. Уларҙы тотош донъяла күрәсәктәр. Сөнки һеҙҙең бөтәгеҙ ҙә - халҡым минең..., - тине кисә аҙағында Ләйсәнә Илгиз ҡыҙы.Рәйсә МУСИНА. А.ЗӘЙНЕТДИНОВ һәм автор фотолары.