Яңыртылған парк - стәрлебаштарҙың яратҡан урыны буласаҡ

Стәрлебаштарҙың шатлығын уртаҡлашырға ҡәҙерле ҡунаҡ, БР Дәүләт Йыйылышы-Ҡоролтай депутаты Рузалия Хисмәтуллина килде, уны ауыл халҡы һәр саҡ ҙур шатлыҡ менән ҡаршы ала. Паркты асыу тантанаһында район хакимиәте башлығы Рөстәм Рахманғолов, район Советы рәйесе Юнир Рысаев, элекке район хакимиәте башлығы Фәнүр Туҡтаров, ауыл биләмәләре башлыҡтары, район учреждениелары һәм предприятиелары етәкселәре, ауыл халҡы ҡатнашты.

Ҡунаҡтарҙы икмәк-тоҙ, ҡымыҙ, гармун көйөнә дәртле йыр-бейеүҙәр менән ҡаршы алғас, улар паркка килеүселәр араһында популяр булып өлгөргән «Я люблю Стерлибашево» арт-объекты менән танышты. Ҡайғылы әсә һәйкәленә тере сәскәләр һалды. Төрлө һуғыштарҙа һәләк булғандарҙы, һуғыштан ҡайтҡас вафат булған яҡташтарын хөрмәтләп иҫкә алды. Фонтанды эшләтеп ебәрҙеләр. Яңы балалар майҙансығын, Стәрлебаш башланғыс мәктәбе уҡыусылары сығыштарын һәм уларҙың дәртле флеш-мобын ҡараны. «Сәләмәт быуын - көслө төбәк» республика проектында ҡатнашыусыларға старт бирҙеләр, һәм улар яңы асфальт юлдан йүгереп үтте. Мәктәптәр, балалар баҡсалары, Балалар сәнғәт мәктәбе, Балалар ижад йорто, үҙәк район дауаханаһының хеҙмәт коллективтары вәкилдәре ойошторған «Көҙгө муллыҡ» күргәҙмәһе ҡунаҡтары булды. Ә байрам аҙағында, «Заманса ҡала мөхите булдырыу» проекты сиктәрендә паркты реконструкциялауҙа ҡатнашыусыларҙы һәм ошо матур сараны ойоштороусыларҙы Рәхмәт хаттары менән бүләкләп, сағыу концерт ҡаранылар.