Һалдат шинеле кеймәгән егет егет буламы?

Бына уҙған йома «Стәрле» спорт-һауыҡтырыу комплексында яҡын арала армия хеҙмәтенә алынасаҡ үҫмерҙәр йыйылды. Бында спорт ярыштары үтте. Быға тиклем улар иртән М.Ғ.Мәхмүтов исемендәге тыуған яҡты өйрәнеү музейына барып, унда районыбыҙ тарихы менән танышты. Стәрлебаш һәм Миәкә райондары буйынса хәрби комиссар урынбаҫары Ринат Ғәлимов һәм спорт комитеты рәйесе Рөстәм Яруллин егеттәргә изге теләктәрен белдерҙе. Старттан һуң улар төркөмдәргә бүленеп, кемдер атырға тирға, икенселәре автомат төшөрөлгән стендҡа, өсөнсө төркөм - турникка, дүртенсеһе - противогаз ятҡан өҫтәлгә йүнәлде. Ярыштар башланды һәм бик ҡыҙыу барҙы! Ваҡыт һиҙелмәй ҙә үтеп китте. Ойоштороу комитеты йомғаҡ яһағансы , егеттәр «Берҙәм Рәсәй» урындағы партия бүлексәһенең башҡарма комитеты етәксеһе Наилә Ғиззәтуллина ойошторған тәм-том менән ҡайнар сәй эсеп, ял итте. Сараның тантаналы өлөшөндә егеттәрҙе СССР Ҡораллы Көстәр ветераны Әҙхәт Ғәлиев, район ветерандар советы рәйесе Кәлимулла Шәрәфетдинов һәм имаммөхтәсиб Зөфәр Биктимеров ҡотлап, буласаҡ һалдаттарға изге теләктәрен белдереп, хеҙмәттәрен иҫән-имен тултырып ҡайтыуҙарын теләнеләр. Артабан, егеттәр Балалар ижад йорто ойошторған матур концерт ҡараны. Байрам аҙағында һәр призывникка йәштәр эштәре комитеты рәйесе Рафаэль Әбүләев бүләктәр тапшырҙы. «Призывник көнө», башҡа йылдарҙағы кеүек үк, бик ҡыҙыҡлы һәм фәһемле булды. Буласаҡ Ватан һаҡсыларына хеҙмәттәрен намыҫлы үтәп, ир ҡорона инеп ҡайтыуҙарын теләйбеҙ.

Лиана ЙӘРМИЕВА. А.ЗӘЙНЕТДИНОВ фотоһы.