Сергей Греков Өфө мэры вазифаһын ваҡытлыса башҡарыусы итеп тәғәйенләнде

Ҡала Советы рәйесе Валерий Трофимов баш ҡала хакимиәте башлығы вазифаһын ваҡытлыса башҡарыусы тураһында мәсьәләне фекер алышыуға сығарҙы. Республика Башлығы хакимиәте етәксеһе Александр Сидякин Сергей Грековтың кандидатураһы менән таныштырҙы һәм халыҡ һайланыусыларынан уны хуплауҙарын һораны. «Ике йыл элек ошо трибунанан Өлфәт Мостафин менән таныштырғайным. Бер кем дә шулай килеп сығыр тип уйламаны. Әлбиттә, Өфө мэрһыҙ була алмай. Тиҙҙән ҡар яуыр, ҡаланың 450 йыллығына әҙерләнергә кәрәк. Радий Фәрит улы үҙе килергә теләгәйне, ләкин Сибайҙан ҡайтып өлгөрә алманы, — тине Александр Сидякин. — Беҙ һеҙгә Сергей Грековтың кандидатураһын ҡарарға тәҡдим итәбеҙ. Ул Ишембайҙа тыуып үҫкән, ләкин бөтә тормошо Өфө менән бәйле». Ултырышта ҡатнашҡан 27 депутаттың барыһы ла Греков өсөн тауыш бирҙе. Яңы етәксе ҡаланың юбилейына әҙерләнә башларға, юлдарҙың торошон күҙәтергә һәм өфөләрҙең фекерен иҫәпкә алырға кәрәклеген билдәләне. Белешмә Сергей Греков 1968 йылдың 3 сентябрендә Ишембайҙа тыуған. СССР Ҡораллы Көстәрендә хеҙмәт иткән. Г.В. Плеханов исемендәге Рәсәй иҡтисад академияһын тамамлаған. Республиканың нефть химияһы тармағы предприятиеларында эшләгән. «Газтехресурс» яуаплылығы сикләнгән йәмғиәтен төҙөгән һәм етәкләгән. «Пилот» техник системалар ғилми-тикшеренеү институтын ойошторған. Институт ғилми эшмәкәрлек, нефть табыу һәм быраулау өлкәһендә ҡорамалдар һәм технологиялар индереү йүнәлештәре буйынса эшләй. «Ойл-Автоматика» компанияһын булдырған, ул да ошо тармаҡта эшләй. Бөтә предприятиелар ҙа Өфөлә теркәлгән. Өйләнгән, ете бала тәрбиәләй. "Башинформ" агентлығы.