Ир абруйы - иленән

Уны һуңғы юлға оҙатырға бик күп кеше, хатта күрше ауылдарҙан да килделәр. Мосолман дине ҡанундарына ярашлы зыяратҡа ирҙәр менән бер ҡатарҙан йөрөү хоҡуғынан мәхрүм ҡатын-ҡыҙҙар Собханғоловтарҙың иркен өйөнән ары китмәне. Ҡайғылы ла, һағышлы ла ҡараштарын бер нөктәгә төбәп, ара-тирә бер-береһенә һүҙ ҡушып, мәйетте һуңғы юлға әҙерләүҙе сабыр ғына көттөләр. Ә күңелдәрен көрөрәк тоторға тырышҡан ирҙәр, көрәк менән ҡоралланып, әруахтар донъяһының мәңгелек төйәге булған зыяратта ҡасан ғына әле өҙә баҫып йөрөгән ауылдаштары өсөн һуңғы төйәкте хәстәрләне.

Ошо көндәрҙә Ҡабыҡҡыуыш ауылында 73 йәшен бер ай элек кенә тултырған Рим Минеғол улы Собханғолов менән мәңгегә хушлаштылар. Бер туған апайым Роза менән илле йылдан ашыу ғүмер кисергән, дүрт ҡыҙға атай, ә миңә еҙнә ине ул. 30-сы һәм 40-сы йылдар баштарында донъяға килгән бик күптәр кеүек үк, уға ла бер тапҡыр ҙа “Атай!” тип өндәшеү бәхете тәтемәне. Ауылда һигеҙенсе класты тамамлап, механизатор һөнәренә эйә булды ла шул саҡтағы "Маяҡ” колхозында эшләне.

“Эшләне”, тип әйтеү генә етмәҫ, сөнки Совет хөкүмәте тарафынан “Дуҫлыҡ” ордены кеүек юғары наградаға лайыҡ булыу өсөн фиҙакәрлек тә күрһәтергә кәрәк. Тап шул сифат ураҡ кеүек ҡыҙыу кампанияла аттай егелеп эшләгән алдынғы комбайнсы Рим Собханғоловты КПСС ағзаһы булыу кеүек ул йылдарҙағы юғары исемгә лайыҡ иттерҙе. Тап шул сифат, юғары йәки махсус урта белеме булмаһа ла, “Маяҡ” колхозының һуңғы йылдарында хужалыҡтың баш инженеры вазифаһы йөкмәтелеүгә нигеҙ булды.

Ҡыҫҡаһы, ата-бабалар традицияһын дауам итеп, коммунист Собханғолов та йорт һалды, балалар үҫтерҙе, ағас ултыртты. Ир абруйы – иленән. Ихлас, ярҙамсыл, йомарт тәбиғәтле, кеше күңелен тәрән аңлаған, һәм хәтер ҡалдырырлыҡ һүҙҙәре менән рәнйетмәгән Рим еҙнә ауылдаштарының ғына түгел, уны күреп белгән барлыҡ кешеләрҙең күңелендә шулай һаҡланыр.

Мәхмүт ХУЖИН.

Өфө ҡалаһы.

Читайте нас:

Газета зарегистрирована (ПИ №ТУ 02-01461 от 05.10.2015 г.) в Управлении Федеральной службы по надзору в сфере связи, информационных технологий и массовых коммуникаций по Республике Башкортостан.

УЧРЕДИТЕЛИ: Агентство по печати и средствам массовой информации Республики Башкортостан, Государственное унитарное предприятие Республики Башкортостан Издательский дом «Республика Башкортостан».

Телефон

8 (34739) 22356

Электрон почта

[email protected]

Адресы

453830, Республика Башкортостан, c. Стерлибашево,ул. Карла Маркса, 102.

Реклама хеҙмәте

8 (34739) 22354

Редакция

8 (34739) 22353

Ҡабул итеү бүлмәһе

8 (34739) 22353

Хеҙмәттәшлек

8 (34739) 22378

Кадрҙар бүлеге

8 (34739) 22354