«Тамыр» телеканалының «Бирешмә!» проекты Бронза Орфей яуланы

«Бронза Орфейҙы беҙ ҙур, күп яҡлы һәм яратҡан телетарихыбыҙға баһа тип ҡабул итәбеҙ: сериал, ошондай уҡ исемле музыкаль төркөм, хәйриә концерттары, яңы йыл фильм-әкиәте, аҙналыҡ «Бирешмә! Профи» программаһы һәм «Бирешмә!» беренсе балалар премияһы», — тине проект авторы, «Тамыр» телеканалы директоры Гөлназ Ҡолһарина.

«Һеҙ телевидение менән тормош араһына сифатлы күпер һалаһығыҙ. Тамашасылар менән ысын, йәнле бәйләнеште күрһәтеүгә өлгәштегеҙ. Шуныһы мөһим: һеҙ бер яҡлы тормош менән йәшәмәйһегеҙ, ә тамашасыларҙы, үҫмерҙәрҙе йәлеп итәһегеҙ. Быны профессиональ, сифатлы итеп башҡараһығыҙ».

«Тамыр» — беҙҙең илдә уникаль күренеш, — тип өҫтәне билдәле журналист, НТВ-ла «Однажды…» программаһы авторы, ТЭФИ академигы Сергей Майоров. — Был тәүлек әйләнәһенә эшләгән, үҙ контенынан торған балалар каналы. «Тамыр»ҙың еңеүе маҡтауға лайыҡ!».