Ижади оркестр дирижеры

- Сәхнә - минең бар булмышым! Мәктәптә уҡыған ваҡытта уҡ үҙешмәкәр сәнғәттә әүҙем ҡатнаштым, бында беҙгә уҡытыусыбыҙ Гөлшат Тәтегәсева ярҙам итте, - ти ул. - 11 класс тамамлағандан һуң ата-әсәйем минең педагогия институтына уҡырға инеүемде теләне. Мин: «Мәҙәниәт техникумына, йәки бөтөнләй бер ҡайҙа ла уҡырға бармайым!» тип, үҙ юлымды һайланым. Һәм 2003 йылда яңы ғына уҡыу йортон тамамлаған белгесте Миәкә мәҙәниәт йортона агитбригада методисы итеп эшкә алалар. Бер йылдан һуң уны шунда уҡ башҡорт халыҡ театры режиссеры ярҙамсыһы итеп тәғәйенләйҙәр. Эшкә баш-көллө сума: бик күп сығыш яһайҙар, бихисап конкурстарҙа ҡатнашалар. Венера Нуриян ҡыҙы үҙе лә сәхнәлә уйнай. Төрлө ролдәр башҡара, әммә, айырыуса, уның комедия ролдәре һәйбәт килеп сыға. Быға ул 2009 йылда район Мәҙәниәт йортонда эшләй башлағас стәрлебаштар ҙа инана. Спектаклдәр, скетчтар, юмористик миниатюраларҙа В.Латипова уйнаған персонаждар тамашасылар күңеленә хуш килә. Уҙған йылда яңы йыл тамашаһында «Морозко» әкиәтендәге Марфушенька ғына ни тора! Ә шулай ҙа уның төп хеҙмәте тамашасыларға күренмәй. Концерт программалары һәм сәхнә өҙөктәре ойоштороусыһы булыу еңелдән түгел. Был ҙур яуаплылыҡ талап итә, берәй нимә була ҡалһа барыһына ла ул яуап бирә. Әммә Венера Нуриян ҡыҙы хеҙмәт ауырлыҡтары алдында баҙып ҡалмай. Ул алсаҡ йөҙлө, мөләйем, дәртле, изгелекле, үҙ эшенең оҫтаһы. Уның ветерандарҙың «Моң шишмә» фольклор ансамблен етәкләүенә бер йыл. Коллектив менән репетициялар аҙнаһына ике тапҡыр үткәрелә. Венера Нуриян ҡыҙы үҙ үрнәгендә күп көс һәм тырышлыҡ һалғанда ғына бар хыялдарҙың тормошҡа ашыуын дәлилләй. Йәш сағында ул сәхнә тураһында хыяллана һәм ныҡышмалылығы, эшһөйәрлеге арҡаһында уны тормошҡа ашыра ала.