Кәбеҫтә менән һарымһаҡты нисек һаҡлау яҡшыраҡ?

Кәбеҫтә аҙыҡ-түлек пленкаһына төрөп ҡуйғанда яҡшыраҡ һаҡлана. Һәр береһен айырым-айырым һауа инмәҫлек итеп 2-3 ҡат төрөргә һәм баҙға төшөрөргә кәрәк. Пленка кәбеҫтәгә мөмкин тиклем нығыраҡ йәбешеп торорға тейеш.

Ә һарымһаҡҡа килгәндә, ул ҡыш уртаһында уҡ кибә, серей башларға мөмкин. Быны булдырмау өсөн, киптерелгән һарымһаҡты эмалле кәстрүлдә бойҙай оно менән аралаштырып һаҡларға мөмкин. Һарымһаҡтар бер-береһенә тейеп тормаҫҡа тейеш. Өҫтөнә лә күмелерлек итеп он һибергә. Кәстрүлдең ҡапҡасын ҡапларға һәм аш-һыу бүлмәһенә ҡоро урынға ҡуйырға.

Һарымһаҡ он эсендә яҙға тиклем боҙолмай һаҡлана. Ул серемәһен, үҫмәһен өсөн төбөндәге ваҡ тамырҙарын яндырырға ла була.

Башҡортостан гәзитенән.