Башҡорт шәле тигән мөғжизә

Өфөнөң бер күрке булған «Һылыуҡай» студияһы ҡыҙҙары (етәксеһе – Линара Таһирова) дебет шәлдәрҙең төрлө өлгөләрен ябынып күрһәтә. Һылыуҙарҙың иңендә аллы-гөллө заманса үәл (үтә күренмәле йоҡа биҙәкле шәл, элегерәк «паутинка» тип йөрөтөлә ине) һәм йылы шәлдәрҙең нәжәғәйе балҡый. Эшҡыуар Алһыу Әпсәләмова коллекцияһынан алынған был күркәм шәлдәр бер кемде лә битараф ҡалдырмай. Ул Мәскәү, Ханты-Мансийск, Хабаровск яҡтарында «Башҡорт шәле» магазиндарын асып, республика оҫталарына шәлдәрен һатырға ярҙамлаша. Әйткәндәй, Алһыу Әпсәләмова һәр фестиваль, конкурс һайын шәлселәр менән яҡындан танышып, яңы шәл үрнәктәрен һайлап ала, үҙ бизнесында эш урыны тәҡдим итә. Улар уйлап тапҡан зауыҡлы биҙәктәрҙе таратыу, оригинал һәм сифатлы авторлыҡ эштәрен пропагандалау ҙа кәрәк бит әле. «Дөрөҫөн әйткәндә, бик яҡшы шәлдәр бәйләгән ҡатын-ҡыҙҙар ысын мәғәнәһендә авторлыҡҡа дәғүә итә ала», – ти эшҡыуар. Мәҫәлән, бер нисә йыл рәттән район һәм республика кимәлендә Гран-при яулаған Зөлфиә Бикбулатова, Роза Кәлиева, Фәнүзә Яубаҫарова (Ейәнсура ра­йонынан) бәйләгән зауыҡлы, күңелле, сифатлы шәлдәр айырым каталогҡа индереүгә, ә оҫталар үҙҙәре айырым дәүләт наградаларына лайыҡ. Уларҙың энәһенән төшкән башҡорт шәлдәре иң юғары талаплы халыҡ-ара күргәҙмәләргә, һөнәрмәнлек музейҙарына ҡуйырлыҡ. Зөлфиә Бикбулатова – Өмбәт ауылыныҡы, Иҫәнғолда тора. Уның үҙенең шәлдәре тураһында фекере бик ҡәтғи: «Бөтә серем шунда – мин ашыҡмайым, һәр күҙәнәкте еренә еткереп бәйләйем. Эшемдең йәнә бер үҙенсәлеге һәм өҫтөнлөгө – үҙебеҙҙең яҡтың иң яҡшы дебетен һайлап алам, Ҡарғалы, Байыш ауылдарында һатыла ул мамыҡтар. «Башҡорт шәле» фестивалдәре беҙҙең шәлселәр өсөн оҫталыҡ дәресе, күңелде үҫтерә, яуаплылыҡ һәм дәрт бирә, кеше араһында йөҙөбөҙ яҡты, хөрмәт күрәбеҙ. Бындай йыйындарҙы ойоштороп йөрөгән яҡташыбыҙ Нәзирә Кәримова, мәҙәниәт йорто хеҙмәткәрҙәре мең йәшәһен».

Сәрүәр СУРИНА,